പഴയ നോട്ട് ഉപയോഗിക്കാം

ഗവണ്‍മെന്റ് ആശുപത്രികള്‍, ഫാര്‍മസികള്‍, റെയില്‍വേ ടിക്കറ്റ് , സര്‍ക്കാര്‍ ബസുകള്‍, വിമാനടിക്കറ്റ്, മെട്രോ റെയില്‍, ഹൈവേകളിലെയും റോഡുകളിലെയും ടോള്‍, റെയില്‍വേയിലെ ഭക്ഷണം, വൈദ്യുതിബില്‍, വെള്ളക്കരം, പാചകവാതക സിലിന്‍ഡര്‍, ഗവണ്‍മെന്റ് മില്‍ക്ക് ബൂത്ത്, ശ്മശാനങ്ങള്‍, കോടതി ഫീസ്, കേന്ദ്രസംസ്ഥാന സര്‍ക്കാരുകളുടെയും തദ്ദേശഭരണ സ്ഥാപനങ്ങളുടെയും നികുതികള്‍, പിഴകള്‍, ഫീസ്, ചാര്‍ജ് എന്നിവ അടയ്ക്കല്‍. കോഓപ്പറേറ്റീവ് സ്റ്റോറുകളിലെ ഇടപാടുകള്‍ എന്നിവയ്ക്ക പഴയ നോട്ട് ഉപയോഗിക്കാം.

9027 കോടി കറന്‍സി നോട്ടുകള്‍

മാര്‍ച്ചിലെ കണക്കനുസരിച്ച് 9027 കോടി കറന്‍സി നോട്ടുകളാണ് ഇന്ത്യയില്‍ പ്രചാരത്തിലുള്ളത്. 2200 കോടിയില്‍ പരം നോട്ടുകള്‍ റദ്ദാക്കിയപ്പോള്‍ അതിനുതക്ക മൂല്യത്തിനുള്ള നോട്ടുകള്‍ അച്ചടിച്ച് എത്തിച്ചില്ല.

500 രൂപ നോട്ടുകളില്ല

ഇപ്പോഴും മിക്ക സ്ഥലങ്ങളിലും രണ്ടായിരം രൂപയുടെ കറന്‍സിയേ ലഭിച്ചിട്ടുള്ളൂ. 500 രൂപയുടേത് പലയിടത്തും എത്തിയിട്ടില്ല. ഡല്‍ഹി, മുംബൈ എന്നിവിടങ്ങളില്‍ 500 രൂപ എത്തിച്ചിട്ടുണ്ടെന്നു ഗവണ്‍മെന്റ് പറഞ്ഞെങ്കിലും അവിടെയും ബാങ്കുകളിലോ എടിഎമ്മുകളിലോ ഈ കറന്‍സി ലഭിക്കുന്നില്ല. രണ്ടു മൂന്നു ദിവസത്തിനകം പുതിയ കറന്‍സി എല്ലായിടത്തും എത്തിക്കുമെന്നാണു കേന്ദ്ര ധനമന്ത്രാലയം പറയുന്നത്.

ഒരു ഐഡി ഉപയോഗിച്ച് നോട്ടുമാറ്റല്‍ ഒരിക്കല്‍ മാത്രം

ഒരു തിരിച്ചറിയല്‍ കാര്‍ഡ് ഉപയോഗിച്ച് ഒരു തവണ മാത്രമേ 4000 രൂപയുടെ പഴയ കറന്‍സി മാറ്റി വാങ്ങാനാവൂ. കൂടുതല്‍ കറന്‍സി ഉണ്ടെങ്കില്‍ ബാങ്കില്‍ അക്കൗണ്ട് തുടങ്ങി അതില്‍ നിക്ഷേപിക്കണം. പിന്നീട് പണം പിന്‍വലിക്കാം. ഒരേ ഐഡി ഉപയോഗിച്ചു പല ദിവസം 4000 രൂപ വീതം പഴയ കറന്‍സി മാറ്റിവാങ്ങുന്ന സാഹചര്യം കണക്കിലെടുത്ത് ആര്‍ബിഐയാണ് പുതിയ നിര്‍ദേശം പുറപ്പെടുവിച്ചത്.

ദേശീയപാതകളില്‍ 14 വരെ ടോള്‍ വേണ്ട

തിങ്കള്‍ അര്‍ധരാത്രി വരെ ദേശീയപാതകളില്‍ ടോള്‍ പിരിവ് നിര്‍ത്തി. ഇന്നലെ അര്‍ധരാത്രി വരെ നിര്‍ത്തിവച്ചിരുന്നതാണു നീട്ടിയത്.

ബാങ്കുകള്‍ ഇന്നും നാളെയും

രാജ്യത്തെ ബാങ്കുകള്‍ രണ്ടാംശനിയാഴ്ചയും ഞായറാഴ്ചയും തുറന്നു പ്രവര്‍ത്തിക്കും. കറന്‍സി കൈമാറ്റവും നിക്ഷേപവും പിന്‍വലിക്കലും നടത്താം.