നോട്ട് പിന്‍വലിക്കല്‍ തീരുമാനം നടപ്പിലായ ശേഷമുള്ള റിസര്‍വ് ബാങ്കിന്റെ ആദ്യ ധന-വായ്പാ അവലോകന നയം റിസര്‍വ് ബാങ്ക് പ്രഖ്യാപിച്ചു. റിപ്പോ-റിവേഴ്‌സ് റിപ്പോ നിരക്കുകളില്‍ മാറ്റം വരുത്താന്‍ ബാങ്ക് തയ്യാറായില്ല.

നോട്ട് നിരോധനം മൂലം വളര്‍ച്ചാ നിരക്കിലുളള ആശങ്കയാണ് റിപ്പോ നിരക്കില്‍ മാറ്റം വരുത്തുന്നതില്‍ നിന്നും ആര്‍ബിഐയെ പിന്തിരിപ്പിച്ചത്.നിരക്കുകള്‍
റിപ്പോ നിരക്ക്- 6.25%
റിവേഴ്‌സ് റിപ്പോ നിരക്ക്- 5.75%
സി ആര്‍ ആര്‍- 4%

നയരൂപീകരണത്തിനു വേണ്ടിയുള്ള രണ്ടുദിവസത്തെ മോണിറ്ററി പോളിസി മീറ്റിംഗിനു ശേഷമാണ് പ്രഖ്യാപനം. നവംബര്‍ 8നു നോട്ടുനിരോധനം വന്നശേഷം ആദ്യായമായാണ് ആര്‍ ബി ഐയുടെ ധനാവകലോകന പ്രഖ്യാപനം വന്നത്. ഉര്‍ജിത്ത് പട്ടേല്‍ റിസര്‍വ് ബാങ്ക് ഗവര്‍ണറായ ശേഷമുള്ള രണ്ടാമത്തെ വായ്പാ നയപ്രഖ്യാപനമാണ്.

രാജ്യത്തെ ബാങ്കുകളുള്‍പ്പെടെ എല്ലാ മേഖലയിലുള്ളവരും ഉറ്റുനോക്കിയിരുന്ന പ്രഖ്യാപനമാണ് ഇന്നത്തേത്. 500ന്റേയും 1000ന്റേയും പഴയ നോട്ടുകള്‍ പിന്‍വലിച്ചതോടെ ബാങ്കുകളില്‍ വന്‍ നിക്ഷേപവര്‍ധനയാണ് ഉണ്ടാകുന്നത്.

കഴിഞ്ഞ ഒക്ടോബറില്‍ നടന്ന നയപ്രഖ്യാപനത്തിലാണ് ആറുവര്‍ഷത്തിനിടയിലെ ഏറ്റവും കുറഞ്ഞ റിപ്പോ നിരക്ക് രേഖപ്പെടുത്തിയത്.