ബാങ്കുകളില്‍നിന്നും പണം പിന്‍വലിക്കുന്നതിനുള്ള നിയന്ത്രണം റിസര്‍വ് ബാങ്ക് പിന്‍വലിക്കുന്നു. മാര്‍ച്ച് 13 മുതല്‍ നിയന്ത്രണങ്ങളുണ്ടാകില്ല. സേവിംഗ്‌സ് അക്കൗണ്ടില്‍ നിന്നും ഈ മാസം 23 മുതല്‍ ആഴ്ചയില്‍
50,000 രൂപ പിന്‍വലിക്കാമെന്നു റിസര്‍വ്വ് ബാങ്ക് ഗവര്‍ണര്‍ ഉര്‍ജിത്പട്ടേല്‍ പറഞ്ഞു.

അതേസമയം, അടിസ്ഥാനനിരക്കുകളില്‍ മാറ്റമില്ലാതെ വായ്പാനയം പ്രഖ്യാപിച്ച റിസര്‍വ് ബാങ്ക്, നടപ്പുസാമ്പത്തികവര്‍ഷം
വളര്‍ച്ചാനിരക്ക് കുറയുമെന്ന സൂചനയും നല്‍കി. നോട്ടുപിന്‍വലിച്ച ശേഷമുള്ള രണ്ടാമത്തെ ധന-നയ അവലോകനയോഗത്തിന് ശേഷമാണ് പണംപിന്‍വലിക്കുന്നതിന് നിലനില്‍ക്കുന്ന നിയന്ത്രണം എടുത്തുകളയുമെന്ന് ആര്‍ബിഐ ഗവര്‍ണര്‍ പ്രഖ്യാപിച്ചത്. മാര്‍ച്ച് 13 മുതല്‍ എല്ലാ നിയന്ത്രണങ്ങളും പിന്‍വലിക്കും. അന്നുമുതല്‍ സേവിംഗ്‌സ് അക്കൗണ്ടുകളില്‍
നിന്നു അന്‍പതിനായിരം രൂപവരെ ആഴ്ചയില്‍ പിന്‍വലിക്കാം. നിലവിലിത് ഇരുപത്തിനാലായിരമായിരുന്നു.
അതേസമയം, അടിസ്ഥാനനിരക്കുകളില്‍ മാറ്റമില്ലാതെയാണ് ഈ സാമ്പത്തികവര്‍ഷത്തെ അവസാനത്തെ പണവായ്പാനയം റിസര്‍വ്വ് ബാങ്ക് പ്രഖ്യാപിച്ചത്. വാണിജ്യ ബാങ്കുകള്‍ ആര്‍ബിഐയില്‍നിന്ന് സ്വീകരിക്കുന്ന ഹൃസ്വകാല വായ്പകളുടെ പലിശയായ റിപ്പോ നിരക്ക് 6.25ശതമാനത്തിലും റിവേഴ്‌സ് റിപ്പോ നിരക്ക് 5.75 ശതമാനമായും തുടരും. അനുകൂലസാഹചര്യങ്ങള്‍ നിലനില്‍ക്കുന്നതിനാല്‍ നിരക്ക് കുറയ്ക്കുമെന്നായിരുന്നു സാമ്പത്തികരംഗത്തിന്റെ പ്രതീക്ഷ.

നോട്ട് പിന്‍വലലിക്കലിന് ശേഷം ബാങ്കുകള്‍ സ്വമേധയാ വായ്പാനിരക്ക് കുറയ്ക്കാന്‍ തയ്യാറായതും ഈ തീരുമാനത്തിന് അനുകൂലമായി. എന്നാല്‍, നടപ്പുസാമ്പത്തികവര്‍ഷം വളര്‍ച്ചാനിരക്ക് 6.9 ശതമാനമായി കുറയുമെന്ന് ആര്‍ബിഐ അറിയിച്ചു. നേരത്തെയിത് 7.1ശതമാനത്തിലെത്തുമെന്നായിരുന്നു പ്രതീക്ഷ.