രാജ്യത്തെ മുന്‍നിര ടെലികോം കമ്പനികളായ എയര്‍ടെല്‍, വൊഡാഫോണ്‍, ഐഡിയ എന്നിവ ഉടന്‍ തന്നെ ഇന്റര്‍നെറ്റ് ഡാറ്റാ നിരക്കുകള്‍ കുറച്ചേക്കുമെന്ന് സൂചന.

303 രൂപക്ക് പ്രതിമാസം 30ജിബി ഡാറ്റ നല്‍കുന്ന ഓഫര്‍ ജിയോ ചൊവ്വാഴ്ച്ച പ്രഖ്യാപിച്ചിരുന്നു. ഇതിനെത്തുടര്‍ന്നാണ് ഈ കമ്പനികളും ഡാറ്റ നിരക്കുകള്‍ കുറയ്ക്കാന്‍ ഒരുങ്ങുന്നത്. ജിയോയുടെ നിലവിലുള്ള വരിക്കാര്‍ക്ക് ഒറ്റത്തവണയായി 99 രൂപ നല്‍കി പ്രൈം അംഗത്വമെടുക്കുമ്പോഴാണ് 303 രൂപ നിരക്കില്‍ ഡാറ്റ ഉപയോഗം അനുവദിക്കുന്നത്.

ജിയോയുടെ പുതിയ ഓഫര്‍ പ്രധാനമായും എയര്‍ടെല്‍, ഐഡിയ, വൊഡാഫോണ്‍ എന്നീ കമ്പനികളെ ലക്ഷ്യം വച്ചുള്ളതാണ്. ഈ നീക്കത്തെ ചെറുക്കാനാണ് എയര്‍ടെല്‍ ഉള്‍പ്പെടെയുള്ള ടെലികോം കമ്പനികള്‍ ഇന്റര്‍നെറ്റ് നിരക്കുകള്‍ കുറയ്ക്കാന്‍ ആലോചിക്കുന്നത്.നിലവില്‍ എയര്‍ടെല്‍ 28 ദിവസത്തെ കാലാവധിയുള്ള 1 ജിബി 4ജി ഡാറ്റക്ക് 345 രൂപയാണ് ഇൗടാക്കുന്നത്. പരിധി ഇല്ലാതെ വിളിക്കാനും ഇതോടൊപ്പം സാധിക്കും. ഇതേ പ്ലാനിന് വൊഡാഫോണ്‍ 349 രൂപയും, ഐഡിയ 348 രൂപയും ഈടാക്കുന്നുണ്ട്.