സര്‍ക്കാര്‍ ഓഫീസുകള്‍ക്കും പാന്‍ കാര്‍ഡ് നിര്‍ബന്ധമാക്കുന്നു. പണമിടപാടു നടത്തുന്ന എല്ലാ സര്‍ക്കാര്‍ ഓഫീസുകളും അടിയന്തരമായി പാന്‍കാര്‍ഡ് എടുക്കണമെന്നു സര്‍ക്കാര്‍ വകുപ്പുതലത്തില്‍ നിര്‍ദേശം നല്‍കിത്തുടങ്ങി.

പണമിടപാടുകള്‍ സുഗമമാക്കാനാണു പാന്‍ നമ്പര്‍ നിര്‍ബന്ധമാക്കുന്നതെന്നാണു സര്‍ക്കാറിന്റെ വിശദീകരണം. നിലവില്‍ ടാക്‌സ് ഡിഡക്ഷന്‍ ആന്‍ഡ് കലക്ഷന്‍(ടാന്‍)നമ്പറാണ് സര്‍ക്കാര്‍ ഓഫീസുകളുടെ പണമിടപാടിന് ഉപയോഗിക്കുന്നത്.

എന്നാല്‍, സര്‍ക്കാര്‍ ഓഫീസുകള്‍ക്കു പാന്‍കാര്‍ഡ് എടുക്കുന്നതിന്റെ പ്രായോഗികതയെക്കുറിച്ച് ഉദ്യോഗസ്ഥരില്‍ ആശയക്കുഴപ്പമാണ്. ഓഫീസുകള്‍ക്ക് എങ്ങനെയാണ് പാന്‍ കാര്‍ഡ് എടുക്കേണ്ടതെന്ന മാര്‍ഗ്ഗനിര്‍ദേശം നല്‍കാത്തതാണ് ഉദ്യോഗസ്ഥരില്‍ ആശയക്കുഴപ്പം സൃഷ്ടിക്കുന്നത്.

നിലവില്‍ ഭൂരിഭാഗം സര്‍ക്കാര്‍ ഓഫീസുകളും പണമിടപാടുകള്‍ക്ക് ഉപയോഗിക്കുന്നതു ട്രഷറി എസ്ബി അക്കൗണ്ടുകളാണ്. നവംബര്‍ 8ന് പഴയ കറന്‍സി നോട്ടുകളുടെ നിരോധനം നടപ്പായ ശേഷം ട്രഷറി വഴി 50,000 രൂപയില്‍ കൂടുതല്‍ കൈമാറ്റം നടത്തുന്ന സര്‍ക്കാര്‍ ഓഫീസുകള്‍ക്ക് പാന്‍ നമ്പര്‍ ആവശ്യപ്പെട്ടു തുടങ്ങി കഴിഞ്ഞു. ട്രഷറി ബാങ്കിംഗ് മേഖലയിലായതിനാല്‍ പണമിടപാടുകള്‍ക്കുള്ള സോഫ്റ്റ്വെയറില്‍ ബാങ്കുകള്‍ക്കു സമാനമായ നിയന്ത്രണം ഏര്‍പ്പെടുത്തുകയായിരുന്നു.