ഓണ്‍ലൈനിലൂടെ ട്രെയിന്‍ ടിക്കറ്റുകള്‍ ബുക്ക് ചെയ്യുന്നതിന് ആധാര്‍ കാര്‍ഡുകള്‍ നിര്‍ബന്ധമാക്കാന്‍ റെയില്‍വേ തയ്യാറെടുക്കുന്നു. അനധികൃതമായ ടിക്കറ്റ് ബുക്കിംഗും തട്ടിപ്പുകളും തടയുന്നതിനാണ് ആധാര്‍ നിര്‍ബന്ധമാക്കുന്നത്.

എന്നാല്‍ റെയില്‍വേ ടിക്കറ്റുകള്‍ക്ക് ആധാര്‍ കാര്‍ഡ് നിര്‍ബന്ധമാക്കരുതെന്ന സുപ്രീം കോടതി വിധി നില നില്‍ക്കവേയാണ് ആധാര്‍ നിര്‍ബന്ധമാക്കാന്‍ റെയില്‍വേ മന്ത്രാലയം തയ്യാറെടുക്കുന്നത്.

ഈ നടപടിക്ക് മുന്നോടിയായി ഏപ്രില്‍ ഒന്നു മുതല്‍ മുതിര്‍ന്ന പൗരന്‍മാര്‍ക്കുള്ള കണ്‍സഷന്‍ ടിക്കറ്റുകള്‍ക്ക് ആധാര്‍ നിര്‍ബന്ധമാക്കും. മൂന്നു മാസത്തേയ്ക്ക് പരീക്ഷണാടിസ്ഥാനത്തിലാണിത്. തുടര്‍ന്ന് മറ്റു ടിക്കറ്റുകള്‍ക്കും ഇത് ബാധകമാക്കുമെന്നാണ് സൂചന. ഒരുപാട് ടിക്കറ്റുകള്‍ കൂട്ടത്തോടെ ബുക്ക് ചെയ്യുന്നതും, ട്രാവല്‍ ഏജന്‍സികള്‍ വ്യാജപേരുകളില്‍ ടിക്കറ്റെടുത്ത് കരിച്ചന്തയില്‍ വില്‍ക്കുന്നത് തടയാനുമാണ് സര്‍ക്കാറിന്റെ പുതിയ നടപടി.

ടിക്കറ്റ് ബുക്കിംഗിന് ആധാര്‍ നിര്‍ബന്ധമാക്കുന്നതോടൊപ്പം ഓണ്‍ലൈന്‍ ടിക്കറ്റുകള്‍ വ്യാപകമാക്കാനും സര്‍ക്കാര്‍ ഉദ്ദേശിക്കുന്നു. കറന്‍സി രഹിതമായി ടിക്കറ്റെടുക്കുന്നതിനായി പുതിയ പ്രത്യേക ആപ്പും മെയ് മാസത്തോടെ റെയില്‍വേ പുറത്തിറക്കും. ഡിജിറ്റലായി ടിക്കറ്റുകളെയുക്കാന്‍ 6,000 ടിക്കറ്റ് വില്‍പന യന്ത്രങ്ങളും 1,000 ടിക്കറ്റ് വെന്‍ഡിംഗ് മെഷീനുകളും രാജ്യത്തെമ്പാടും സ്ഥാപിക്കാനും തീരുമാനിച്ചിട്ടുണ്ട്.