കുറഞ്ഞ ചെലവിൽ വിമാനത്തിൽ കറങ്ങാൻ ഇതാ ഒരു കിടിലൽ ഓഫർ. ഇൻഡിഗോ വിമാന ടിക്കറ്റുകൾ വെറും 899 രൂപയ്ക്ക്. ഒരു പ്രമോഷണൽ പരിപാടിയുടെ ഭാഗമായാണ് വിമാന ടിക്കറ്റ് നിരക്ക് കുത്തനെ കുറച്ച് ഇൻഡിഗോ രംഗത്തെത്തിയിരിക്കുന്നത്.

അഹമ്മദാബാദ്, അമൃത്സർ, ബാഗ്ഡോഗ്ര, ബംഗളൂരു, ചെന്നൈ, ഡൽഹി, ഗോവ, ഗുവാഹത്തി, ഹൈദരാബാദ്, ജയ്പൂർ, ജമ്മു, കൊച്ചി, കൊൽക്കത്ത, മുംബൈ, പുനൈ, ശ്രീനഗർ, വിശാഖപട്ടണം എന്നിവിടങ്ങളിലേയ്ക്കുള്ള വൺവേ ടിക്കറ്റുകൾക്ക് മാത്രമാണ് ഈ നിരക്ക്. അഗർത്തല, ചണ്ഡീഗഢ്, കോയമ്പത്തൂർ, ഡെറാഡൂൺ, മധുര, മംഗലാപുരം, പോർട്ട് ബ്ലെയർ, പട്ന, വാരാണസി എന്നിവിടങ്ങളിലേയ്ക്കും ഇതേ ഓഫർ നിരക്കിൽ യാത്രാ ചെയ്യാം.

യാത്ര ചെയ്യേണ്ട ദിവസത്തിന് കുറഞ്ഞത് 20 ദിവസം മുമ്പെങ്കിലും ബുക്ക് ചെയ്യുന്നവർക്ക് മാത്രമേ ഓഫർ ലഭിക്കുകയുള്ളൂ. ജൂൺ 26നും 2018 മാർച്ച് 24നും ഇടയിൽ യാത്ര ചെയ്യാനുള്ള ടിക്കറ്റുകളാണ് 899 രൂപ മുതലുള്ള ഓഫർ നിരക്കിൽ ലഭിക്കുക. ഇത് ഇൻഡിഗോയുടെ എല്ലാ ബുക്കിംഗ് ചാനലുകൾ വഴിയും ലഭ്യമാണ്.

കഴിഞ്ഞ ദിവസം സ്പൈസ് ജെറ്റും 12 രൂപയ്ക്ക് രാജ്യത്തിനകത്തും പുറത്തും വിമാനത്തിൽ യാത്ര ചെയ്യാനുള്ള വമ്പൻ ഓഫറുമായി രംഗത്തെത്തിയിരുന്നു. സ്പൈസ്ജെറ്റിന്റെ പന്ത്രണ്ടാം വാർഷികത്തോടനുബന്ധിച്ച് പ്രഖ്യാപിച്ച ഈ ഓഫർ മേയ് 28 വരെ ലഭ്യമാണ്. കഴിഞ്ഞ മേയിലും സ്പൈസ് ജെറ്റ് ഡിസ്കൌണ്ട് നിരക്കിൽ ടിക്കറ്റുകൾ വിറ്റിരുന്നു. 869 രൂപയുടെ ടിക്കറ്റുകളാണ് അന്ന് കമ്പനി വിറ്റത്.

എയർ ഇന്ത്യ, എയർ എഷ്യ, ജെറ്റ് എയർവേസ്, ഗോ എയർ എന്നീ കമ്പനികളും അടുത്തിടെ ഡിസ്കൗണ്ട് നിരക്കുകളിൽ ടിക്കറ്റുകൾ വാഗ്ദാനം ചെയ്തിരുന്നു. വിമാനക്കമ്പനികൾ തമ്മിലുള്ള മത്സരവും അതിനെ തുടർന്നുള്ള ഓഫറുകളും വിമാനത്തിൽ യാത്ര ചെയ്യുന്നവരുടെ എണ്ണത്തിൽ വർദ്ധനവുണ്ടാക്കിയിട്ടുണ്ടെന്നാണ് വിദഗ്ധരുടെ വിലയിരുത്തൽ.

malayalam.goodreturns.in