റിലയൻസ് ജിയോ ബ്രോഡ് ബാൻഡ് സേവനമായ 'ജിയോ ഫൈബർ' ദീപാവലിക്ക് എത്തും. 500 രൂപയ്ക്ക് 100 ജിബി ഡാറ്റ എന്ന വമ്പൻ ഓഫറോടെയാകും ജിയോ ഫൈബർ പുറത്തിറക്കുക. നൂറ് നഗരങ്ങളിൽ ബ്രോഡ്ബാൻഡ് സേവനം എത്തിക്കാനാണ് കമ്പനിയുടെ പദ്ധതി.

ജിയോ ഫൈബറിന്റെ കടന്നു വരവോടെ ടെലികോം രംഗത്ത് മറ്റൊരു വിപ്ലവത്തിന് തുടക്കം കുറിക്കുമെന്നാണ് വിദഗ്ധരുടെ വിലയിരുത്തൽ. മറ്റ് കമ്പനികൾ നൽകുന്നതിന്റെ ഇരട്ടി ഡാറ്റാ പകുതി വിലയ്ക്കാകും ജിയോ ഫൈബർ നൽകുക.

കഴിഞ്ഞ വർഷം സെപ്റ്റംബറിലാണ് റിലയൻസ് ജിയോ ചെയർമാൻ മുകേഷ് അംബാനി ഫൈബർ ടു ദി ഹോം (എഫ്.ടി.എച്ച്) എന്ന സേവനത്തെക്കുറിച്ച് ഔദ്യോ​ഗികമായി വെളിപ്പെടുത്തിയത്. ഇത് ബ്രോഡ്ബാൻഡ് വേഗത 1 ജിബിപിഎസ് വരെ ലഭ്യമാക്കും. രാജ്യത്തെ 10 നഗരങ്ങളിൽ നിലവിൽ സേവനം നൽകുന്നുണ്ട്. ഡൽഹിയിലെ എൻ.സി.ആർ മേഖല, നോയിഡ, ഗുഡ്ഗാവ് എന്നിവിടങ്ങളിലാണ് ഇപ്പോൾ സേവനം ലഭിക്കുന്നത്.

ജനങ്ങള്‍ തിങ്ങിപാര്‍ക്കുന്ന റസിഡന്‍ഷ്യല്‍ മേഖലകൾ, വാണിജ്യ സ്ഥാപനങ്ങള്‍ എന്നിവിടങ്ങളിലാകും ആദ്യഘട്ടത്തില്‍ സേവനം നല്‍കുക. ഡിസംബറോടെ 100 ഇടങ്ങളിലേക്ക് സേവനം വ്യാപിപ്പിക്കും.

malayalam.goodreturns.in