രാജ്യത്ത് പെട്രോൾ വില ലിറ്ററിന് 1.23 രൂപയും ഡീസലിന് 89 പൈസയും കൂടി. ആഗോള വിപണിയിൽ ക്രൂഡ് ഓയിലിന്റെ വില വർദ്ധിച്ചതാണ് ഇന്നലെ അ‍‍ർദ്ധരാത്രിയോടെ പെട്രോൾ വില കൂടാൻ കാരണം. കഴിഞ്ഞ രണ്ടാഴ്ചയായി ഇന്ധന വില മാറ്റമില്ലാതെ തുടരുകയായിരുന്നു.

മെയ് 16ന് പെട്രോളിന് 2.16 രൂപയും ഡീസലിന് 2.10 രൂപയും കുറച്ചിരുന്നു. രാജ്യത്തെ ഏറ്റവും വലിയ ഇന്ധന റീട്ടെയിൽ കമ്പനിയായ ഇന്ത്യൻ ഓയിൽ കോർപ്പറേഷൻ (ഐ.ഒ.സി) അധികൃതർ നൽകുന്ന വിവരം അനുസരിച്ച് പ്രാദേശിക വിലക്കയറ്റം, വാറ്റ് എന്നിവ ഒഴിവാക്കിയാണ് ഇപ്പോൾ പെട്രോളിന്റെ വില കൂട്ടിയിരിക്കുന്നത്. നികുതി നിരക്ക് അനുസരിച്ച് യഥാർത്ഥ വർദ്ധനവ് ഉയരും.

ഡൽഹിയിൽ ലിറ്ററിന് 65.32 രൂപയായിരുന്ന പെട്രോൾ വില 66.91 രൂപയായി. ഡീസലിന്റെ നിലവിലെ വിലയായ 54.90 രൂപയിൽ നിന്ന് 55.94 രൂപയായി ഉയർന്നു.