കേരളത്തിന്റെ ആവശ്യങ്ങൾ

കശുവണ്ടി പരിപ്പിന്റെയും കയറിന്റെയും നികുതി കുറയ്ക്കണമെന്ന് കേരളം ആവശ്യപ്പെട്ടിരുന്നു. ഇവയുടെ നികുതി 12 ശതമാനത്തിൽ നിന്ന് അഞ്ച് ശതമാനമായി കുറച്ചിട്ടുണ്ട്. ലോട്ടറിയുടെ നികുതി 18നു ചേരുന്ന യോ​ഗം തീരുമാനിക്കും. എയർകണ്ടീഷൻഡ് അല്ലാത്ത റെസ്റ്റോറന്റുകളെ സേവന നികുതിയിൽ നിന്ന് ഒഴിവാക്കണമെന്നും പ്ലൈവുഡിന്റെ നികുതി കുറയ്ക്കണമെന്നുമുള്ള കേരളത്തിന്റെ ആവശ്യം കൗൺസിൽ അം​ഗീകരിച്ചില്ല.

ഇൻസുലിന് അഞ്ച് ശതമാനം

പ്രമേഹരോ​ഗികൾക്ക് ആശ്വസിക്കാം. ഇൻസുലിന്റെ നികുതി 12 ശതമാനത്തിൽ നിന്ന് അഞ്ച് ശതമാനമായി കുറച്ചു. 12 ശതമാനമായിരുന്ന അ​ഗ‍ർബത്തീസിന്റെ നികുതിയും അഞ്ച് ശതമാനമാക്കിയിട്ടുണ്ട്.

സിനിമാ ടിക്കറ്റിന് നികുതി കുറയും

സിനിമ തിയേറ്ററിൽ 100 രൂപ വരെയുള്ള ടിക്കറ്റിന് 18 ശതമാനവും 100 രൂപയിൽ കൂടുതലുള്ള ടിക്കറ്റിന് 28 ശതമാനവും നികുതി ഈടാക്കും. നിലവിൽ 28 മുതൽ 110 ശതമാനം വരെയാണ് ഓരോ സംസ്ഥാനത്തുമുള്ള വിനോദനികുതി. ദേശീയതലത്തിൽ 30 ശതമാനമാണ് ശരാശരി നികുതി.

അച്ചാറിന് പുതിയ നികുതി

അച്ചാറിന്റെ നികുതി 18 ശതമാനത്തിൽ നിന്ന് 12 ശതമാനമായി കുറച്ചു. പായ്ക്കറ്റിലാക്കിയ പഴം, പച്ചക്കറി എന്നിവയുടെ നികുതിയും 18 ശതമാനത്തിൽ നിന്ന് 12 ശതമാനമാക്കിയിട്ടുണ്ട്. കൂടാതെ ഇൻസ്റ്റന്റ് ഭക്ഷണ പദാ‍ർത്ഥങ്ങളുടെയും നികുതി കുറച്ചിട്ടുണ്ട്.

സ്കൂൾ ബാ​ഗിനും വില കുറയും

28 ശതമാനമായിരുന്ന സ്കൂൾ ബാ​ഗിന്റെ നികുതി 18 ശതമാനമായി കുറച്ചു. കൂടാതെ കോൺക്രീറ്റ് പൈപ്പ്, പ്രിന്റർ, ട്രാക്ടറിന്റെ ഭാ​ഗങ്ങൾ എന്നിവയുടെ നികുതിയിലും ഇളവ് വരുത്തിയിട്ടുണ്ട്.

ചെറുകിട ​ഹോട്ടലുകൾക്ക് തിരിച്ചടി

അര ശതമാനമായിരുന്ന ചെറുകിട ഹോട്ടലുകളുടെ നികുതി അഞ്ച് ശതമാനമായി ഉയർത്തി. ഇത് കച്ചവടക്കാർക്ക് തിരിച്ചടിയാകും.