ജിഎസ്ടി നടപ്പിലായതോടെ കോഴി വില കുത്തനെ കുറയുമെന്ന് കരുതിയവർക്ക് തെറ്റി, വില കുതിച്ചുയരുകയാണ്. സംസ്ഥാനത്ത് കഴിഞ്ഞ മൂന്നു ദിവസത്തിനുള്ളിൽ വില കുത്തനെ ഉയർന്നു. ജിഎസ്ടി വരുന്നതോടെ വില കുറയുമെന്നോർത്ത് ക‍ർഷകർ ഉത്പാദനം കുറച്ചതാണ് വില കുതിക്കാൻ കാരണം.

14.5 ശതമാനമായിരുന്നു ജിഎസ്ടിക്ക് മുമ്പ് ഇറച്ചിക്കോഴിയുടെ നികുതി. എന്നാൽ ജിഎസ്ടിയിൽ ഇറച്ചിക്കോഴിക്ക് നികുതി പൂർണമായും ഒഴിവാക്കി. സാധാരണ​ഗതിയിൽ കോഴിക്ക് വില കുറയേണ്ടതാണ്. എന്നാൽ ഉത്പാദനം കുറഞ്ഞത് വൻ തിരിച്ചടിയായി.

ഈ സാഹചര്യം മുതലെടുത്ത് മറ്റു സംസ്ഥാനങ്ങളിലെ കച്ചവടക്കാർ വില ഉയർത്തിയതോടെ സംസ്ഥാനത്തെ കോഴി വില പിടിച്ചാൽ കിട്ടാതെയായി. തമിഴ്‌നാട്, കർണാടക സംസ്ഥാനങ്ങളിൽ നിന്നാണ് പ്രധാനമായും കേരളത്തിലേയ്ക്ക് കോഴി എത്തുന്നത്.

രണ്ട് മാസത്തോളമായി സംസ്ഥാനത്ത് കോഴിവില ഉയരുക തന്നെയായിയരുന്നു. ഏപ്രിൽ, മേയ് മാസങ്ങളിൽ ക്രമാതീതമായി ചൂടു വർധിച്ചതുമൂലം കോഴിക്കുഞ്ഞുകൾ കൂട്ടത്തോടെ ചത്തതാണ് വില ഉയരാൻ കാരണം.

malayalam.goodreturns.in