സംസ്ഥാനത്തെ വ്യാപാര സ്ഥാപനങ്ങളിൽ നാളെ മുതൽ വാണിജ്യ നികുതി ഉദ്യോഗസ്ഥർ പരിശോധന നടത്തുമെന്ന് ധനമന്ത്രി തോമസ് ഐസക് അറിയിച്ചു. പരിശോധന തടയാനുള്ള ഒരു സമ്മർദ്ദത്തിനും വഴങ്ങില്ലെന്നും അദ്ദേഹം പറഞ്ഞു.

വിലക്കുറവ് പ്രാബല്യത്തിലാക്കാതെ കൊള്ളലാഭമുണ്ടാക്കുന്ന വ്യാപാരികളെ കുടുക്കുകയാണ് പരിശോധനയുടെ ലക്ഷ്യം. കഴിഞ്ഞ ദിവസങ്ങളിൽ സംസ്ഥാനത്തിന്റെ വിവിധ ഭാഗങ്ങളിൽ ലീഗൽ മെട്രോളജി നടത്തിയ മിന്നൽ പരിശോധനയിൽ നിരവധി ക്രമക്കേടുകൾ കണ്ടെത്തിയിരുന്നു. ഇക്കാര്യത്തിൽ കേന്ദ്രം ശക്തമായ ഇടപെടലുകൾ നടത്തണമെന്നും മന്ത്രി പറഞ്ഞു.

ജി.എസ്.ടി വന്നതോടെ പലവ്യഞ്ജനങ്ങൾക്കടക്കം എം.ആർ.പിയെക്കാൾ കൂടുതൽ വില ഇൗടാക്കുന്നുണ്ടെന്ന പരാതിയെത്തുടർന്നാണ് പരിശോധന. സൂപ്പർ മാർക്കറ്റുകൾ, നിത്യോപയോഗ സാധനങ്ങൾ വിൽക്കുന്ന കടകൾ എന്നിവിടങ്ങളിൽ അമിതവില ഇൗടാക്കിയാൽ നിയമനടപടികൾ സ്വീകരിക്കുമെന്ന് അധികൃതർ പറഞ്ഞു.

പാക്കറ്റുകളിൽ രേഖപ്പെടുത്തിയ എംആർപിയേക്കാൾ അധിക വില ഈടാക്കുക, എംആർപി മറയ്ക്കുക, മായ്ക്കുക, എംആർപി രേഖപ്പെടുത്താതെ വിൽപ്പന നടത്തുക, പ്രഖ്യാപിത അളവിലും തൂക്കത്തിലും എണ്ണത്തിലും കുറവു വരുത്തുക, അളവു തൂക്ക ഉപകരണങ്ങൾ യഥാസമയം മുദ്ര പതിപ്പിക്കാതെ ഉപയോഗിക്കുക തുടങ്ങിയ നിയമ ലംഘനങ്ങളാണ്‌ മുഖ്യമായും പരിശോധിക്കുക.

malayalam.goodreturns.in