എസ്ബിഐ ഉപഭോക്താക്കൾക്ക് സന്തോഷവാർത്ത; സേവന നിരക്ക് വെട്ടിക്കുറച്ചു!!!

ജൂലായ് 15 മുതല്‍

നെറ്റ് ബാങ്കിംഗ്, മൊബൈല്‍ ബാങ്കിംഗ് എന്നിവ വഴിയുള്ള പണമിടപാടുകളുടെ സേവന നിരക്കുകളാണ് കുറയുക. ജൂലായ് 15 മുതല്‍ ഇത് പ്രാബല്യത്തില്‍ വരും.

എന്‍ഇഎഫ്ടി

എന്‍ഇഎഫ്ടിയിലൂടെ 10000 രൂപ വരെ നെറ്റ് ബാങ്കിംഗ് വഴിയോ മൊബൈല്‍ ബാങ്കിംഗ് വഴിയോ കൈമാറുന്നതിനുള്ള സേവനനിരക്ക് മുമ്പ് രണ്ട് രൂപയായിരുന്നു. എന്നാൽ ഇപ്പോൾ അത് ഒരു രൂപയായി കുറച്ചിട്ടുണ്ട്. 10000നും ഒരുലക്ഷത്തിനുമിടയിലുള്ള തുക കൈമാറുന്നതിനുള്ള നിരക്ക് നാലിൽ നിന്ന് രണ്ട് രൂപയായും കുറച്ചിട്ടുണ്ട്.

ഒരു ലക്ഷത്തിന് മുകളിൽ

ഒരു ലക്ഷത്തിനും രണ്ടു ലക്ഷത്തിനുമിടയിലുള്ള തുകയ്ക്ക് 12 രൂപയിൽ നിന്ന് മൂന്ന് രൂപയായും, രണ്ട് ലക്ഷത്തിന് മുകളിലുള്ള തുകയ്ക്ക് 20 രൂപയിൽ നിന്ന് അഞ്ച് രൂപയായും നിരക്ക് കുറച്ചിട്ടുണ്ട്.

ആര്‍ടിജിഎസ്

ആര്‍ടിജിഎസിലൂടെ രണ്ട് ലക്ഷത്തിനും അഞ്ച് ലക്ഷത്തിനുമിടയിൽ പണമിടപാട് നടത്തുന്നതിന് 20ൽ നിന്ന് അഞ്ച് രൂപയായും അഞ്ച് ലക്ഷത്തിന് മുകളിൽ പണമിടപാട് നടത്തുന്നതിന് 40 രൂപയിൽ നിന്ന് 10 രൂപയായുമാണ് നിരക്ക് കുറച്ചിരിക്കുന്നത്. ഐഎംപിഎസ് വഴി ആയിരം രൂപ വരെ കൈമാറുന്നതിനുള്ള നിരക്കുകള്‍ അടുത്തിടെ എസ്ബിഐ ഒഴിവാക്കിയിരുന്നു.