1.44 കോടി വാർഷിക ശമ്പളം വാഗ്ദാനം ചെയ്ത് ചണ്ഡീഗഡ് സ്വദേശിയായ 16കാരനെ ജോലിക്ക് തിരഞ്ഞെടുത്തിട്ടില്ലെന്ന് ​ഗൂ​ഗിൾ. ഹർഷിത് ശർമ്മ എന്ന കൗമാരക്കാരനാണ് ഈ മാസം കമ്പനിയുടെ അമേരിക്കയിലുള്ള ഗ്രാഫിക് ഡിസൈനിംഗ് ടീമിൽ അംഗമാകുമെന്ന വാ‍ർത്തകൾ കഴിഞ്ഞ ദിവസം പുറത്തു വന്നത്.

നിലവിൽ ഹർഷിത് ശർമ്മയെക്കുറിച്ച് കമ്പനി രേഖകളിൽ യാതൊരു വിവരവുമില്ലെന്നാണ് ​ഗൂ​ഗിൾ വ്യക്തമാക്കിയിരിക്കുന്നത്. പതിനാറുകാരനായ ഹർഷിത് ശർമ്മയുടെ ഏറ്റവും വലിയ സ്വപ്നമായിരുന്നു ​ഗൂ​ഗിളിൽ ജോലി നേടുക എന്നത്.

ചണ്ഡീഗഡ് സെക്ടർ 33ലെ സർക്കാർ മോഡൽ സീനിയർ സെക്കൻഡറി സ്കൂൾ വിദ്യാർത്ഥിയായ ഹർഷിത്ത് ​ഗൂ​ഗിളിലെ പരിശീലന കാലയളവിൽ തനിക്ക് നാല് ലക്ഷം രൂപ സ്റ്റൈഫന്റ് ലഭിക്കുമെന്നും പറഞ്ഞിരുന്നു. എന്നാൽ അടുത്തിടെ ലോകത്തെവിടെ നിന്നുമുള്ള സ്കൂളുകളിൽ നിന്ന് ​ഗൂ​ഗിൾ റിക്രൂട്ട് ചെയ്തിട്ടില്ലെന്ന് വ്യക്തമാക്കിയതോടെ കാര്യങ്ങൾ തകിടം മറിയുകയായിരുന്നു.

ഹരിയാനയിലെ കുരുക്ഷേത്രയിൽ മതാന സ്വദേശിയാണ് ഹർഷിത്ത്. 11-ാം ക്ലാസ്സിൽ വിവര സാങ്കേതികവിദ്യയാണ് പഠനത്തിനായി തെരെഞ്ഞെടുത്തത്. ഹർഷിത്തിന്റെ മാതാപിതാക്കൾ സ്കൂൾ അദ്ധ്യാപകരാണ്.

malayalam.goodreturns.in