ബിജെപി ദേശീയ അദ്ധ്യക്ഷന്‍ അമിത് ഷായുടെ ആസ്തി അഞ്ച് വര്‍ഷം കൊണ്ട് 300 ശതമാനം വര്‍ദ്ധിച്ചു. എട്ടര കോടിയായിരുന്ന ആസ്തി 34 കോടി രൂപയായാണ് വര്‍ദ്ധിച്ചത്.

ടൈംസ് ഓഫ് ഇന്ത്യയുടെ അഹമ്മദാബാദ് എഡിഷനിലും ഡിഎന്‍എ പത്രത്തിലുമാണ് ഇത് സംബന്ധിച്ച വാര്‍ത്തകള്‍ ആദ്യം വന്നത്. എന്നാല്‍ മണിക്കൂറുകള്‍ക്കകം തന്നെ വാര്‍ത്ത ഇരു മാധ്യമങ്ങളും വെബ്‌സൈറ്റില്‍ നിന്ന് പിന്‍വലിച്ചു. ഇത് സമൂഹ മാധ്യമങ്ങളില്‍ വലിയ പ്രതിഷേധത്തിനിടയാക്കിയിട്ടുണ്ട്.

2012ല്‍ ഗുജറാത്ത് നിയമസഭാ തെരഞ്ഞെടുപ്പിലെയും രാജ്യസഭാ തെരഞ്ഞെടുപ്പിലെയും സത്യവാങ്മൂലം താരതമ്യം ചെയ്തപ്പോഴാണ് അമിത് ഷായുടെ ആസ്തിയിലെ വന്‍ വര്‍ദ്ധനവ് പുറത്തായത്.

രണ്ട് കോടി 60 ലക്ഷം രൂപയുടെ ബാധ്യത 47 ലക്ഷമായി കുറയുകയും ചെയ്തിട്ടുണ്ട്. 10 കോടി 38 ലക്ഷം രൂപയുടെ ആസ്തി പാരമ്പര്യമായി കിട്ടിയതാണെന്നാണ് അമിത് ഷാ നൽകുന്ന വിശദീകരണം. കേന്ദ്രമന്ത്രി സ്മൃതി ഇറാനിയുടെ വിദ്യാഭ്യാസ യോഗ്യത സംബന്ധിച്ച വിവരങ്ങളും പുറത്തായിരുന്നു.

malayalam.goodreturns.in