സ്റ്റോക്ക് മാർക്കറ്റ് വഴി നടക്കുന്ന കള്ളപ്പണം വെളുപ്പിക്കൽ തടയുന്നതിനായി ഓഹരികൾ വാങ്ങാനും മ്യൂച്വൽ ഫണ്ട് നിക്ഷേപങ്ങൾക്കും ആധാർ നിർബന്ധമാക്കിയേക്കും. ഇത് സംബന്ധിച്ച ചർച്ചയിലാണ് സർക്കാരും സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയും (സെബി).

നികുതി വെട്ടിപ്പ് തടയാൻ ആധാറും പാൻ കാർഡും മാത്രം ബന്ധിപ്പിച്ചിട്ട് കാര്യമില്ലെന്നാണ് വിദ​ഗ്ധരുടെ വിലയിരുത്തൽ. ഓഹരി, മ്യൂച്വൽ ഫണ്ട് നിക്ഷേപങ്ങൾക്ക് ആധാർ നിർബന്ധമാക്കിയാൽ കള്ളപ്പണം വെളുപ്പിക്കൽ ഒരു പരിധി വരെ തടയാനാകുമെന്നും നിരീക്ഷക‍ർ പറയുന്നു.

സ്റ്റോക്ക് മാർക്കറ്റിൽ കള്ളപ്പണം ഒഴുക്കാനായി ഒന്നിലധികം പാൻ കാ‍ർഡുകളും വ്യാജ ഡീമാറ്റ് അക്കൗണ്ടുകളും ഉപയോഗിക്കുന്നവർ നിരവധിയാണ്. എന്നാൽ ഒരേ വ്യക്തിക്ക് ഒന്നിലധികം പാന്‍ കാര്‍ഡുകള്‍ അനുവദിച്ചതായി കണ്ടെത്തിയതിനെ തുടര്‍ന്നാണ് രാജ്യത്തെ 11.44 ലക്ഷത്തോളം പാന്‍ കാര്‍ഡുകള്‍ റദ്ദാക്കിയിരുന്നു.

മറ്റ് നിരവധി മേഖലകളിലും ആധാർ ഇപ്പോൾ നിർബന്ധമാണ്. വോട്ടേഴ്‌സ് ഐഡി കാര്‍ഡും ആധാറുമായി ബന്ധിപ്പിക്കേണ്ടി വരുമെന്നാണ് ഏറ്റവും ഒടുവിൽ പുറത്തു വന്ന വിവരം.

malayalam.goodreturns.in