രാജ്യത്തെ ഏറ്റവും വലിയ പൊതുമേഖലാ കപ്പൽ നിർമാണശാലയായ കൊച്ചിൻ ഷിപ്പ് യാർഡിന്റെ ഓഹരികൾ ഇന്ന് വിപണിയിലെത്തും. രാവിലെ 8.45ന് മുംബൈയിലെ ബോംബെ സ്റ്റോക്ക് എക്സ്ചേഞ്ച് ഇന്റർനാഷണലിൽ നടക്കുന്ന ലിസ്റ്റിംഗ് സെറിമണിയിൽ കേന്ദ്ര ഷിപ്പിംഗ് മന്ത്രി നിധിൻ ഗഡ്കരി പങ്കെടുക്കും.

ഓഹരി ഒന്നിന് 432 രൂപയാണ് ഇഷ്യു വില. നിക്ഷേപകരിൽ നിന്ന് മികച്ച പ്രതികരണം ലഭിച്ചതു കൊണ്ട് തന്നെ മികച്ച പ്രീമിയം ലഭിക്കുമെന്നാണ് പ്രതീക്ഷ.

ഓഹരി വിൽപ്പനയിലൂടെ ലഭിക്കുന്ന 1468 കോടി രൂപയിൽ 978.74 കോടി രൂപയാണ് കപ്പൽശാലയ്ക്ക് ലഭിക്കുക. ബാക്കി തുക കേന്ദ്ര സർക്കാരിന് ലഭിക്കും. 3.4 കോടിയോളം ഓഹരികളാണ് വിൽപ്പനയ്ക്ക് വച്ചിരുന്നത്. ഇതിന് 258. 9 കോടി അപേക്ഷകളാണ് ലഭിച്ചത്.

ആഗസ്റ്റ് ഒന്ന് മുതൽ മൂന്ന് വരെയായിരുന്നു ഐപിഒ. ഐപിഒയിൽ നിന്ന് ലഭിക്കുന്ന പണം കമ്പനിയുടെ വിപുലീകരണ പദ്ധതികൾക്കായി ഉപയോഗിക്കുമെന്ന് കൊച്ചിൻ ഷിപ്പ് യാർഡ് ചെയർമാനും മാനേജിംഗ് ഡയറക്ടറുമായ മധു എസ്. നായർ പറഞ്ഞിരുന്നു.

malayalam.goodreturns.in