സര്‍ക്കാരിന്റെ സാമൂഹ്യ സുരക്ഷ പദ്ധതികള്‍ വഴിയുള്ള ആനുകൂല്യങ്ങള്‍ ലഭിക്കുന്നതിന് ആധാര്‍ വിവരങ്ങൾ നൽകേണ്ട സമയം ഡിസംബര്‍ 31വരെ നീട്ടി. ആനുകൂല്യങ്ങള്‍ ലഭിക്കുന്നതിനായി ആധാര്‍ എന്റോള്‍ ചെയ്യുന്നതിന് കേന്ദ്രസര്‍ക്കാര്‍ സെപ്റ്റംബര്‍ 30 വരെയാണ് നേരത്തെ സമയം അനുവദിച്ചിരുന്നത്.

ആധാര്‍ സംബന്ധിച്ച കേസ് സുപ്രീം കോടതി പരിഗണിക്കവെ, അറ്റോര്‍ണി ജനറല്‍ കെ.കെ വേണുഗോപാലാണ് ഇക്കാര്യം കോടതിയെ അറിയിച്ചത്. കേസില്‍ നവംബര്‍ ആദ്യ ആഴ്ചയിലാകും ഇനി വാദം കേള്‍ക്കുക. രണ്ടാം തവണയാണ് ആധാര്‍ നിര്‍ബന്ധമാക്കാനുള്ള തീയതിയില്‍ കേന്ദ്രം മാറ്റം വരുത്തുന്നത്. ആദ്യം ജൂണ്‍ 30 ആയിരുന്നത് പിന്നീട് സെപ്റ്റംബര്‍ 30ലേക്ക് മാറ്റിയിരുന്നു.

ആധാർ ഡാറ്റാ ബേസ് ഇതിനകം ഒരു ബില്യൺ ജനങ്ങളുടെ ബയോമെട്രിക്സ് രേഖപ്പെടുത്തിയിട്ടുണ്ട്. ആധാർ വിവരങ്ങൾ സൂക്ഷ്മമായി സംരക്ഷിക്കപ്പെടുന്നുണ്ടെന്നാണ് സർക്കാർ വാദിക്കുന്നത്. അതിനെതിരെ പ്രചാരണം നടത്തുന്നവർ നിരീക്ഷണത്തിലാണെന്നാണ് പുതിയ വിവരം.

ഐറിസ് സ്കാനുകളും വിരലടയാളങ്ങളും രേഖപ്പെടുത്തുന്ന ആധാർ കാർഡുകൾ 2009-ലാണ് നിലവിൽ വന്നത്. എന്നാൽ ആദായ നികുതി റിട്ടേണിന് പുറമെ വിവിധ സബ്സിഡികള്‍, സ്കോളര്‍ഷിപ്പുകള്‍, പെന്‍ഷന്‍, ഉച്ചക്കഞ്ഞി പദ്ധതി എന്നിവക്കുകൂടി കേന്ദ്രസര്‍ക്കാര്‍ ആധാര്‍ നിര്‍ബന്ധമാക്കി വിജ്ഞാപനം ഇറക്കിയിരുന്നു.

malayalam.goodreturns.in