ഫ്ലിപ്കാർട്ട്

ഇ-കൊമേഴ്സ് സ്ഥാപനങ്ങളിലെ മുൻ നിരക്കാരായ ഫ്ലിപ്കാർട്ട് ബിഗ് ബില്ല്യണ്‍ ഡേ സെയ്ല്‍സിന് തുടക്കം കുറിക്കാൻ ഇനി ദിവസങ്ങൾ മാത്രം. സെപ്റ്റംബർ 20 മുതൽ സെപ്തംബർ 24 വരെ ഓൺലൈൻ വിപണിയുടെ ചരിത്രത്തിലെ ഏറ്റവും വലിയ വിൽപനയാണ് ഫ്ലിപ്കാർട്ട് ലക്ഷ്യം വയ്ക്കുന്നത്. വിവിധ വിഭാഗങ്ങളിലുള്ള ഉൽപ്പന്നങ്ങള്‍ക്ക് 90 ശതമാനം വരെ വിലകിഴിവാണ് ഫ്ലിപ്കാർട്ട് വാഗ്ദാനം ചെയ്യുന്നത്.

സ്മാർട്ട്ഫോണുകൾ പകുതി വിലയ്ക്ക്

ഫ്ലിപ്കാർട്ട് ചില ബ്രാൻഡുകളുടെ സ്മാർട്ട്ഫോണുകൾ പകുതി വിലയ്ക്ക് വിൽക്കുമെന്ന് സൂചനയുണ്ട്. കൂടാതെ പുസ്തകങ്ങള്‍, ഇലക്ട്രോണിക്‌സ് ഉപകരണങ്ങൾ, ഫര്‍ണിച്ചറുകൾ, വസ്ത്രങ്ങൾ എന്നിവയും ഓഫര്‍ വിലയില്‍ ലഭിക്കും. എന്നാൽ ഏതൊക്കെ ബ്രാൻഡുകളാണെന്ന് വ്യക്തമല്ല.

ഷോപ്പ്ക്ലൂസ്

സെപ്തംബർ 21നും സെപ്തംബർ 28നും ഇടയ്ക്കാണ് ഷോപ്പ്ക്ലൂസിന്റെ മഹാ ഭാരത് ദീപാവലി സെയ്ൽ ആരംഭിക്കുന്നത്. വമ്പിച്ച ഓഫറുകളാണ് ഷോപ്പ്ക്ലൂസും ഉപഭോക്താക്കൾക്ക് വാഗ്ദാനം ചെയ്യുന്നത്.

ആമസോൺ

ആമസോണിന്റെ ഗ്രേറ്റ് ഇന്ത്യൻ ഫെസ്റ്റിവൽ സെപ്റ്റംബർ 21 മുതൽ 24 വരെയാണ്. മൊബൈൽ ഫോണുകൾക്ക് 40 ശതമാനം വരെയാണ് വിലക്കുറവുള്ളത്. കൂടാതെ 500 മറ്റ് ഓഫറുകളും കമ്പനി പ്രഖ്യാപിച്ചിട്ടുണ്ട്.

ഇലക്ട്രോണിക് ഉപകരണങ്ങൾക്ക് വൻ വിലക്കിഴിവ്

ആമസോണിൽ ലാപ്ടോപ്പുകൾക്ക് 20 ശതമാനം വരെ ഡിസ്കൗണ്ട് ലഭിക്കും. ടിവിക്ക് 40 ശതമാനം, ക്യാമറകൾ, ആക്സസറികൾ എന്നിവയ്ക്ക് 55 ശതമാനം വരെ വിലക്കിഴിവാണുള്ളത്.

പേടിഎം

ദീപാവലി വിൽപനയ്ക്ക് മുന്നോടിയായി 100 കോടി രൂപയാണ് പരസ്യങ്ങൾക്കായി പേടിഎം ചെലവഴിക്കുന്നത്. ക്യാഷ് ബാക്ക് ഓഫറുകളും വൻ വിലക്കിഴിവും നൽകിയാകും പേടിഎമ്മിന്റെയും വിൽപ്പന.