ശമ്പളത്തിൽ വിവേചനം കാണിച്ചുവെന്ന് ആരോപിച്ച് ഗൂഗിളിനെതിരെ കേസുമായി വനിത ജീവനക്കാർ രംഗത്ത്. ഒരേ ജോലിക്ക് പുരുഷൻമാരെക്കാൾ കുറഞ്ഞ ശമ്പളമാണ് സ്ത്രീകൾക്ക് കമ്പനി നൽകുന്നതെന്നാണ് വനിത ജീവനക്കാരുടെ പരാതി. പ്രമോഷനുകൾക്കുള്ള അവസരം നിഷേധിച്ചുവെന്നും പരാതിയിൽ പറയുന്നു.
കെല്ലി എല്ലിസ്, ഹോളി പെയ്സ്, കെല്ലി വിസുരി എന്നീ മൂന്ന് വനിതകളാണ് കാലിഫോണിയയിലെ കോടതിയിൽ കേസ് ഫയൽ ചെയ്തിരിക്കുന്നത്. സോഫ്റ്റർവെയർ എൻജിനീയർ, കമ്മ്യൂണിക്കേഷൻ സ്പെഷ്യലിസ്റ്റ്, മാനേജർ തുടങ്ങിയ തസ്തികകളിൽ മുമ്പ് ജോലി ചെയ്തിരുന്നവരാണ് ഇവർ.
അമേരിക്കയിലെ മറ്റ് ടെക് കമ്പനികൾക്കെതിരെയും സമാനമായ ആരോപണങ്ങളുയർന്നിട്ടുണ്ട്. മൈക്രോസോഫ്റ്റ് ട്വിറ്റർ, ക്വാൽകോം എന്നിവർക്കെതിരെയാണ് വനിതകൾക്കെതിരെ വിവേചനം നടത്തുന്നുവെന്ന് ആരോപണങ്ങളുയർന്നത്.
ക്വാൽകോം കഴിഞ്ഞ വർഷം 19.5 മില്യൺ ഡോളർ നഷ്ടപരിഹാരം നൽകി ഇത്തരമൊരു കേസ് ഒത്തുതീർപ്പാക്കിയിരുന്നു. എന്നാൽ ഗൂഗിൾ ആരോപണം നിഷേധിച്ചിരിക്കുകയാണ്. പരാതി സംബന്ധിച്ച കാര്യം വിശദമായി അവലോകനം ചെയ്യുമെന്നാണ് കമ്പനി അധികൃതരുടെ വെളിപ്പെടുത്തൽ.
malayalam.goodreturns.in