പ്രായപൂർത്തിയാകാത്തവ‍ർക്ക് പ്രവേശനമില്ല

തെലുങ്കാനയിലെ എക്സൈസ് വകുപ്പാണ് പബ്ബുകളിൽ പോകുന്നവർക്ക് ഐഡന്റിറ്റി കാർഡ് അല്ലെങ്കിൽ ആധാർ കാർഡുകൾ നിർബന്ധമാക്കിയിരിക്കുന്നത്. പ്രായപൂർത്തിയാകാത്ത കുട്ടികൾ പബ്ബുകളിൽ പ്രവേശിക്കുന്നത് കർശനമായി തടയാനാണ് ഈ തീരുമാനം.

പതിനേഴുകാരിയുടെ മരണം

17 വയസ്സുള്ള ഒരു പെൺകുട്ടിയുടെ കൊലപാതകത്തെ തുടർന്ന് നടത്തിയ അന്വേഷണത്തിലാണ് ചില ഞെട്ടിക്കുന്ന വിവരങ്ങൾ പൊലീസിന് ലഭിച്ചത്. നഗരത്തിലെ ഒരു പ്രധാന പബ്ബിലെ സ്ഥിരം സന്ദർശകയായിരുന്നു മരിച്ച പെൺകുട്ടിയും അവളുടെ പ്രായപൂർത്തിയാകാത്ത സുഹൃത്തുക്കളും. ഇവ‍ർ മദ്യത്തിനും അടിമകളായിരുന്നു. ഇതിനെ തുടർന്നാണ് പ്രായപൂർത്തിയാകാത്ത കുട്ടികളെ മദ്യം കഴിക്കുന്ന സ്ഥലത്ത് പ്രവേശിക്കുന്നതിനെ ചൊല്ലി ചോദ്യങ്ങളുയർന്നത്.

കർശന നടപടി

ഹൈദരാബാദിലെ എല്ലാ പബ്ബ് ഉടമകൾക്കും എക്സൈസ് വകുപ്പ് കർശന നിർദ്ദേശമാണ് നൽകിയിരിക്കുന്നത്. ആധാർ കാർഡുകൾ കൈവശമുള്ളവരെ മാത്രമേ ഇപ്പോൾ പബ്ബുകളിൽ പ്രവേശിപ്പിക്കുന്നുള്ളൂ. 21 വയസ്സിന് താഴെയുള്ളവർക്ക് ഒരു പബ്ബിൽ പ്രവേശിക്കാൻ അനുവാദമില്ല.

മദ്യത്തിന്റെ അളവ്

പബ്ബുകളിൽ വിതരണം ചെയ്യുന്ന മദ്യത്തിന്റെ അളവിൽ നിയന്ത്രണം വരുത്താനും എക്സൈസ് വകുപ്പ് പബ്ബ് ഉടമകളോട് ആവശ്യപ്പെട്ടിട്ടുണ്ട്. കൂടാതെ ഒല, യൂബ‍ർ തുടങ്ങിയ കാബുകളിൽ പബ്ബിൽ നിന്ന് മടങ്ങുന്നവർക്ക് സുരക്ഷ ഉറപ്പാക്കാനും സർക്കാ‍ർ ശ്രമം നടത്തുന്നുണ്ട്.

മയക്കുമരുന്ന് ഉപയോ​ഗം

പബ്ബിലും ബാറിലും എത്തുന്നവരുടെ പ്രത്യേകം ലിസ്റ്റുകൾ തയ്യാറാക്കണമെന്നും പബ്ബുടമകൾക്ക് നിർദ്ദേശം നൽകിയിട്ടുണ്ട്. പബ്ബുകളിലെ മയക്കുമരുന്ന് ഉപയോ​ഗം കണ്ടെത്തുന്നതിനും എക്സൈസ് നടപടികൾ വ്യാപിപ്പിച്ചിട്ടുണ്ട്.