നോക്കിയയുടെ പ്രീമിയം ആൻഡ്രോയ്ഡ് സ്മാർട്ഫോണായ നോക്കിയ 8 ഇന്ന് മുതൽ ഇന്ത്യൻ വിപണിയിൽ ലഭ്യമാകും. എച്ച്എംഡി ഗ്ലോബലിനു കീഴിൽ വീണ്ടും ആരംഭിച്ച നോക്കിയ ഇതിനകം 3310, നോക്കിയ 3, നോക്കിയ 5, നോക്കിയ 6 എന്നീ ഫോണുകൾ ഇന്ത്യയിൽ അവതരിപ്പിച്ചിട്ടുണ്ട്.

ബജറ്റ് ഫോണായ നോക്കിയ 2 അടുത്തയാഴ്ച രാജ്യാന്തര വിപണിയിൽ അവതരിപ്പിക്കും. നോക്കിയ 8ന് ഏകദേശം 36,999 രൂപയാണ് വില. ആമസോണിൽ നേരത്തെ തന്നെ വില വിവരങ്ങൾ രേഖപ്പെടുത്തിയിരുന്നു. എന്നാൽ നോക്കിയ 8 (6 GB റാം വേരിയന്റ്) ന്റെ വില വിവരം പുറത്തു വിട്ടിട്ടില്ല.

ആന്‍ഡ്രോയ്ഡ് ഫോണുകളുടെ കുത്തൊഴുക്കില്‍ വിപണി പിടിക്കാനാവാതെയാണ് നോക്കിയ പിന്നിലേക്കു പോയത്. ആന്‍ഡ്രോയ്ഡിനെ മറ്റ് മൊബൈല്‍ ഫോണ്‍ കമ്പനികള്‍ ഇരുകൈയും നീട്ടി സ്വീകരിച്ചപ്പോള്‍ നോക്കിയ വിന്‍ഡോസ് ഓപ്പറേറ്റിംഗ് സിസ്റ്റത്തെ കൈവിടാതിരുന്നത് തിരിച്ചടിയായി.

എന്നാൽ മൂന്ന് വർഷത്തിന് ശേഷം നോക്കിയ വൻ തിരിച്ചു വരവാണ് നടത്തിയിരിക്കുന്നത്. ചൈനയിൽ വമ്പൻ സ്വീകാര്യത ലഭിച്ചതിന് ശേഷമാണ് നോക്കിയ ഇന്ത്യയിലേയ്ക്ക് ചുവടുമാറ്റിയത്.

malayalam.goodreturns.in