എയ‍ർ ഇന്ത്യയെ സ്വകാര്യവത്ക്കരിക്കാനുള്ള കേന്ദ്രസർക്കാരിന്റെ നീക്കത്തെ തുടർന്ന് കമ്പനി സ്വന്തമാക്കാൻ ടാറ്റാ ​ഗ്രൂപ്പ് താത്പര്യം പ്രകടിപ്പിച്ചു. ടാറ്റാ സൺസ് ചെയ‍ർമാൻ എൻ. ചന്ദ്രശേഖരനാണ് ഇക്കാര്യം ഒരു സ്വകാര്യ ചാനലിനോട് വെളിപ്പെടുത്തിയത്.

എയ‍ർ ഇന്ത്യയെ സ്വകാര്യവത്ക്കരിക്കാൻ സർക്കാ‍ർ തീരുമാനിച്ചപ്പോൾ തന്നെ ടാറ്റയുടെ പേര് സാധ്യതാ പട്ടികയിലുണ്ടായിരുന്നു. എന്നാൽ ആദ്യമായാണ് കമ്പനിയുടെ ഭാ​ഗത്ത് നിന്ന് പരസ്യ പ്രതികരണം ഉണ്ടാകുന്നത്.

എയർ ഇന്ത്യയുടെ 40 ശതമാനം ഓഹരികൾ ഏറ്റെടുക്കാൻ 2000ൽ ടാറ്റാ താത്പര്യം പ്രകടിപ്പിച്ചിരുന്നു. പിന്നീട് 2013ൽ രത്തൻ ടാറ്റയും ഇക്കാര്യം അന്നത്തെ വ്യോമയാന മന്ത്രിയെ അറിയിച്ചിരുന്നു. എന്നാൽ ഇത് നടക്കാതെ വന്നതോടെയാണ് സിം​ഗപ്പൂർ എയ‍ർലൈനുമായി ചേ‍ർന്ന് വിസ്താരയ്ക്ക് തുടക്കം കുറിച്ചത്.

ഏകദേശം 55,000 കോടി രൂപയുടെ കടബാധ്യതയാണ് ഇപ്പോൾ എയ‍ർ ഇന്ത്യയ്ക്കുള്ളത്. ഈ സാഹചര്യത്തിലാണ് സ്വകാര്യവത്ക്കരണം എന്ന ആശയം നീതി ആയോ​ഗ് മുന്നോട്ട് വച്ചത്.

malayalam.goodreturns.in