മക്ക നഗര പരിധിയിൽ ഹജ്ജ്​ ഉംറ സീസണുകളിലെ ടാക്​സി സ‍ർവ്വീസ് സ്വദേശിവത്​കരിക്കാൻ നീക്കം. ഇതോടെ സ്വദേശികളായ ഏഴായിരം പേർക്ക്​ ജോലി ഉറപ്പാക്കുമെന്നാണ് റിപ്പോർട്ട്​.

മക്കയിൽ 150 ഒാളം ടാക്​സി കമ്പനികൾക്ക്​ കീഴിൽ 7000 ത്തിലധികം കാറുകളുണ്ടെന്നാണ്​ കണക്ക്​. സീസണുകളിലെ ജോലികൾ സ്വദേശികൾക്ക്​ മാത്രമാക്കുന്നതോടെ ഏകദേശം 7000 തൊഴിലവസരമുണ്ടാകുമെന്നാണ്​ റിപ്പോർട്ട്.

എന്നാൽ ഈ തീരുമാനം മലയാളികൾ ഉൾപ്പെടെ ആയിരക്കണക്കിന് വിദേശി തൊഴിലാളികൾക്ക് ആഘാതമാകും. തീരുമാനം നടപ്പിലാക്കുന്നതോടെ ഇവർക്ക്​ ജോലി നഷ്​ടമാകും.
‌
സീസൺ കാലങ്ങളിലാണ് ടാക്സി തൊഴിലുകളുടെ സ്വദേശിവത്ക്കരണം നിർബന്ധമാക്കുക എന്നുണ്ടെങ്കിലും മക്കയിൽ ഓഫ് സീസൺ എന്നത് വളരെ കുറഞ്ഞകാലം മാത്രമാണ് ഉണ്ടാവുക. വ‍‍ർഷങ്ങൾക്ക് മുമ്പ് സൗദിയിൽ മുഴുവൻ ഇങ്ങനെയൊരു നീക്കം നടത്തിയിരുന്നെങ്കിലും പ്രതീക്ഷിച്ച വിജയം കൈവരിച്ചിരുന്നില്ല. എന്നാൽ ഇത്തവണ പദ്ധതിയുടെ വിജയകരമായ പ്രയോഗവത്കരണത്തിനായി സൂപ്പർവൈസിങ് വിഭാഗവും എക്സിക്യൂട്ടീവ് വിഭാഗവും രൂപീകരിച്ചിട്ടുണ്ട്.

malayalam.goodreturns.in