എച്ച്ഡിഎഫ്സി സ്റ്റാൻഡേർഡ് ലൈഫ് ഇൻഷുറൻസിന്റെ പ്രാഥമിക ഓഹരി വിൽപ്പന (ഐപിഒ) നവംബർ 7ന് തുടങ്ങും. 8,700 കോടിയുടെ ഐപിഒ ആണ് കമ്പനി ലക്ഷ്യം വയ്ക്കുന്നത്. ഇക്വിറ്റി ഓഹരിക്ക് 275 മുതൽ 290 രൂപ വരെയാണ് വില.

നവംബർ ഏഴിന് ആരംഭിക്കുന്ന ഐപിഒ നവംബർ 9ന് അവസാനിക്കും. ഐപിഒയിലൂടെ ലഭിക്കുന്ന മൂലധനം കമ്പനിയുടെ വളർച്ചയ്ക്കും ബിസിനസിന് ആവശ്യങ്ങൾക്കുമാകും ഉപയോ​ഗിക്കുകയെന്ന് എച്ച്ഡിഎഫ്സി ചെയർമാൻ ദീപക് പരേഖ് പറഞ്ഞു.

299,827,818 ഓഹരികളാണ് ഐപിഒയിൽ വിൽപ്പനയ്ക്ക് വയ്ക്കുക. 10 രൂപയാണ് മുഖവില. മോർഗൻ സ്റ്റാൻലി ഇന്ത്യ കമ്പനി, എച്ച്ഡിഎഫ്സി ബാങ്ക്, ക്രഡിറ്റ് സൂയിസ് സെക്യൂരിറ്റീസ് (ഇന്ത്യ), സിഎൽഎസ്എ ഇന്ത്യ, നോമുറ ഫിനാൻഷ്യൽ അഡ്വൈസറി ആൻഡ് സെക്യൂരിറ്റീസ് (ഇന്ത്യ) എന്നിവയാണ് ഐപിഒയുടെ ആഗോള കോർഡിനേറ്റർമാരും ലീഡ് മാനേജർമാരും.

ബിഎസ്ഇയിലും എൻഎസ്ഇയിലും ലിസ്റ്റ് ചെയ്യപ്പെട്ട ഇക്വിറ്റി ഷെയറുകളാണ് ഐപിഒയിൽ ലഭ്യമാകുക. ഇന്ത്യയിൽ രജിസ്റ്റർ ചെയ്ത ആദ്യ സ്വകാര്യ ഇൻഷുറൻസ് കമ്പനികളിലൊന്നാണ് എച്ച്ഡിഎഫ്സി സ്റ്റാൻഡേർഡ് ലൈഫ്.

malayalam.goodreturns.in