കേന്ദ്രസർക്കാരിന്റെ നികുതി ഭീകരതയും അതിനെ തുടർന്ന് ജനങ്ങൾക്കുണ്ടായ ആശങ്കകളും ഇന്ത്യൻ വ്യവസായങ്ങളുടെ ആത്മവിശ്വാസം തകർന്നുവെന്ന് മുൻ പ്രധാനമന്ത്രി മൻമോഹൻ സിംഗ്. നികുതി പരിഷ്കരണം ചെറുകിട ബിസിനസുകളെ പിന്നിലാക്കിയതായും അദ്ദേഹം പറഞ്ഞു.

നോട്ട് നിരോധനവും ജിഎസ്ടിയുമാണ് ഇന്ത്യൻ സമ്പദ് വ്യവസ്ഥയെ തകിടം മറിച്ച പ്രധാന കാരണങ്ങളെന്നും പ്രധാനമന്ത്രി നരേന്ദ്രമോഡിയുടെയും ബിജെപി സർക്കാരിൻറെ ദുർബല സാമ്പത്തിക നയങ്ങളുടെ ഫലമാണിതെന്നും അദ്ദേഹം വ്യക്തമാക്കി. നോട്ട് നിരോധനവും ജിഎസ്ടിയും മോശമായി രൂപകല്പന ചെയ്തതും തിടുക്കത്തിൽ നടപ്പാക്കിയതുമാണെന്നും അദ്ദേഹം കൂട്ടിച്ചേർത്തു.

ഇന്ത്യയിലേയ്ക്ക് ചൈനയിൽ നിന്നുള്ള ഇറക്കുമതി വർദ്ധിച്ചതായും അദ്ദേഹം പറഞ്ഞു. 2016-17 ആദ്യ പകുതിയിൽ ചൈനയിൽ നിന്നുളള ഇറക്കുമതി 1.96 ലക്ഷം കോടി രൂപയാണ്. 2017-18ൽ ഇത് 2.41 ലക്ഷമായി വർദ്ധിപ്പിച്ചു.

45,000 കോടിയിലധികം രൂപയുടെ ഇറക്കുമതി ഇക്കാലയളവിൽ വർദ്ധിച്ചിട്ടുണ്ട്. ഒരു വർഷത്തിനുള്ളിൽ 23 ശതമാനം വർദ്ധനവാണ് ഉണ്ടായിരിക്കുന്നതെന്നും അദ്ദേഹം വ്യക്തമാക്കി.

malayalam.goodreturns.in