ബാങ്ക് അക്കൗണ്ടിനും മൊബൈല്‍ നമ്പറിനും പിന്നാലെ എല്ലാത്തരം ഇന്‍ഷുറന്‍സ് പോളിസികള്‍ക്കും ആധാര്‍ നിര്‍ബന്ധമാക്കാന്‍ ഉത്തരവ്. ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്‌മെന്റ് അതോറിറ്റി (ഐ.ആര്‍.ഡി.എ) ആണ് ഉത്തരവ് പുറപ്പെടുവിച്ചിരിക്കുന്നത്.

കള്ളപ്പണം വെളുപ്പിക്കല്‍ തടയല്‍ (മെയിന്റനന്‍സ് ഓഫ് റെക്കോര്‍ഡ്‌സ്) നിയമത്തിലെ രണ്ടാം ഭേദഗതി പ്രകാരമാണ് ഇക്കാര്യം നിര്‍ബന്ധമാക്കിയിരിക്കുന്നത്. ലൈഫ്, ആരോഗ്യ, അപകട ഇന്‍ഷുറന്‍സ് അടക്കം എല്ലാത്തരം പോളിസികള്‍ക്കും ആധാര്‍ നിര്‍ബന്ധമാണ്.

നിലവിലെ പോളിസി ഉടമകളും പുതുതായി പോളിസി എടുക്കുന്നവരും ആധാര്‍ നമ്പര്‍ പാന്‍ നമ്പറുമായും പോളിസിയുമായും ബന്ധിപ്പിക്കണമെന്നും എആര്‍ഡിഎ ഉത്തരവില്‍ പറയുന്നു. ഇതു സംബന്ധിച്ച് ജൂണില്‍ സര്‍ക്കാര്‍ വിജ്ഞാപനം ഇറക്കിയിരുന്നു.

എല്ലാ ലൈഫ്, ജനറല്‍ ഇന്‍ഷുറന്‍സ് കമ്പനികള്‍ക്കും അറിയിപ്പു നല്‍കിയിട്ടുണ്ടെന്നും കൂടുതല്‍ നിര്‍ദേശങ്ങള്‍ക്ക് കാത്തിരിക്കാതെ പദ്ധതി നടപ്പാക്കുകയാണ് വേണ്ടതെന്നും ഐആര്‍ഡിഎഐ വ്യക്തമാക്കി. രാജ്യത്ത് നിലവില്‍ 24 ലൈഫ് ഇന്‍ഷുറന്‍സ് കമ്പനികളും 33 ജനറല്‍ ഇന്‍ഷുറന്‍സ് കമ്പനികളുമാണ് പ്രവര്‍ത്തിക്കുന്നത്.

malayalam.goodreturns.in