വളർത്തുമൃഗ സ്നേഹികൾക്ക് സന്തോഷ വാർത്ത... ഖത്തർ എയർവേയ്സ് പുതിയ ഓഫർ പ്രഖ്യാപിച്ചു. വളർത്തുമൃഗങ്ങളുടെ യാത്രാക്കൂലിയിൽ കുറവ് വരുത്താനാണ് ഖത്തർ എയർവെയ്സിന്റെ തീരുമാനം.
വളർത്തുമൃഗങ്ങൾക്കുള്ള യാത്രാക്കൂലിയിൽ കുറവ് വരുത്തിയതോടൊപ്പം നേരത്തെയുണ്ടായിരുന്നതിൽ നിന്നും ഇരട്ടി തൂക്കവും ഖത്തർ എയർവേയ്സ് അനുവദിച്ചിട്ടുണ്ട്. തങ്ങളുടെ വളർത്തുമൃഗങ്ങളെ കൂടി ഒപ്പം കൊണ്ടുപോകുന്നതിന് യാത്രക്കാർ ഇനി ഖത്തർ എയർവേയ്സ് തെരഞ്ഞെടുക്കുക എന്നതാണ് കമ്പനിയുടെ ലക്ഷ്യം.
യൂറോപ്പിലേക്കും അമേരിക്കൻ രാജ്യങ്ങളിലേക്കും വലിയ വളർത്തുനായകളെ കൊണ്ടുപോകുന്നതിന് നേരത്തേ നിശ്ചയിച്ചിരുന്നത് 400 ഡോളറായിരുന്നു. എന്നാൽ തീരുമാന പ്രകാരം ദോഹക്ക് പുറത്ത് ഇനി ചെലവ് 300 ഡോളർ മാത്രമേയുള്ളൂ.
അതേസമയം, യാത്രക്കാർ സഞ്ചരിക്കുന്ന അതേ വിമാനത്തിൽ വളർത്തുമൃഗങ്ങളെ കൊണ്ടുപോകുന്നതിന് അനുവദിച്ചിരുന്ന തൂക്കത്തിലും ഖത്തർ എയർവേയ്സ് വർദ്ധനവ് പ്രഖ്യാപിച്ചിട്ടുണ്ട്. 32 കിലോഗ്രാമിൽ നിന്നും 75 കിലോഗ്രാമായാണ് പുതിയ തൂക്കം അനുവദിച്ചിരിക്കുന്നത്. വളർത്തുമൃഗങ്ങളെ സ്വന്തം വിമാനത്തിൽ അനുവദിക്കുന്ന ലോകത്തിലെ ചുരുക്കം ചില വിമാനങ്ങളിലൊന്നാണ് ഖത്തർ എയർവെയ്സ്.
malayalam.goodreturns.in