ബുക്കിംഗ്

ജൂലൈയിൽ ഒരു കോടി പേരാണ് ജിയോഫോൺ ബുക്ക് ചെയ്യാൻ ശ്രമിച്ചത്. ഇവർക്കെല്ലാം ജിയോ മെസേജ് അയച്ചിട്ടുണ്ട്. താൽപര്യമുള്ളവർക്ക് മെസേജിലെ ലിങ്കിൽ ക്ലിക്ക് ചെയ്ത് ബുക്ക് ചെയ്യാം. 500 രൂപ ബുക്കിങ് തുകയായി നൽകണം. ബാക്കി 1000 രൂപ ഫോൺ ലഭിക്കുമ്പോൾ നൽകിയാൽ മതി.

1500 രൂപ തിരികെ ലഭിക്കും

ഫോൺ 36 മാസത്തിനുശേഷം തിരികെ നൽകിയാൽ ഈ 1500 രൂപയും തിരിച്ചുനൽകും. ആദ്യം ബുക്ക് ചെയ്യുന്നവർക്ക് ആദ്യം എന്ന രീതിയിലാവും ഫോൺ വിതരണം. സൗജന്യ വോയ്സ് കോൾ, കുറഞ്ഞ നിരക്കിൽ ഡേറ്റ എന്നിവയാണ് ഫോണിനൊപ്പം ജിയോ വാഗ്ദാനം ചെയ്യുന്നത്.

ജിയോ ഫോണിന്റെ പ്രത്യേകതകൾ

ജിയോ മ്യൂസിക്, ജിയോ സിനിമ പോലുള്ള ആപ്ലിക്കേഷനുകളോട് കൂടിയതാണ് ഈ ഫീച്ചർ ഫോൺ. ആൽഫാ ന്യൂമെറിക് കീപാഡ്, 2.4 ഇഞ്ച് ക്യുവിജിഎ ഡിസ്പ്ലേ, എഫ്എം റേഡിയോ തുടങ്ങിയ മറ്റനേകം ഫീച്ചറുകളും ഫോണിൽ ഉൾപ്പെടുന്നു. കൂടാതെ ഫോണിൽ 22 ഭാഷകൾ സപ്പോർട്ട് ചെയ്യും.

ടിവി കേബിൾ

ജിയോ ഫോണിനൊപ്പം ജിയോ ഫോൺ ടിവി കേബിൾ കൂടി ഉപഭോക്താക്കൾക്കു നൽകും. ഏതു ടിവിയുമായും ഈ കേബിൾ വഴി ജിയോ ഫോൺ ബന്ധിപ്പിക്കാം. കൂടാതെ ജിയോ ഫോണിന്റെ വരവോടെ 2ജി ഫോണുകൾ കാലഹരണപ്പെടും.

തുടക്കം

കഴിഞ്ഞ സെപ്റ്റംബർ 5 നാണ് ജിയോ ഔദ്യോഗികമായി തുടങ്ങിയത്. കേവലം 83 ദിവസത്തിനിടെ അഞ്ചു കോടി വരിക്കാരെയും ജിയോ സ്വന്തമാക്കിയിരുന്നു. ഇപ്പോൾ ജിയോയ്ക്ക് 125 മില്യണിലധികം ഉപഭോക്താക്കളുണ്ട്.