ആദായ നികുതി സംബന്ധിച്ച അവ്യക്തതയെ തുടര്‍ന്ന് രാജ്യത്തെ നിക്ഷേപകര്‍ ഡിജിറ്റല്‍ കറന്‍സിയായ ബിറ്റ്‌കോയിന്‍ വിറ്റൊഴിയുന്നു. വ്യാപാരത്തില്‍ മുന്നേറ്റം ഉണ്ടായതോടെ കഴിഞ്ഞ ഒമ്പത് മാസമായി മൂല്യത്തില്‍ മികച്ച നേട്ടമാണ് ബിറ്റ്കോയിൻ ഉണ്ടാക്കിയിരുന്നത്.

ബിറ്റ്കോയിന് 20 മുതല്‍ 30 ശതമാനം വരെ മൂലധന നേട്ട നികുതിയാണ് ബാധകമാകുമെന്ന് സാമ്പത്തിക വിദഗ്ധര്‍ പറഞ്ഞതോടെയാണ് നിക്ഷേപകർ ആശങ്കയിലായത്.

ബിറ്റ്‌കോയിന്‍ ഇടപാട്‌ രാജ്യത്ത് അംഗീകൃതമല്ലെങ്കിലും ബിസിനസ് വരുമാനം അല്ലെങ്കില്‍ മൂലധന നേട്ടം എന്നിവയ്ക്ക് ബാധകമായ ആദായ നികുതിയായിരിക്കും നല്‍കേണ്ടി വരികയെന്ന് വിദ​ഗ്ധർ പറയുന്നു.

ബിറ്റ്കോയിൻ മൂല്യത്തില്‍ പെട്ടെന്ന് വന്‍ കുതിപ്പുണ്ടാക്കിയത് ആഗോള തലത്തില്‍ ആശങ്കയുണ്ടാക്കിയിട്ടുണ്ട്. എപ്പോള്‍ വേണമെങ്കിലും മൂല്യം തകര്‍ന്നേക്കാമെന്നും നിക്ഷേപകർക്ക് വിദഗ്ധർ മുന്നറിയിപ്പ് നൽകിയിട്ടുണ്ട്. അതീവ നഷ്ട സാധ്യതയുള്ളതാണ് ഡിജിറ്റല്‍ കറന്‍സികളിലെ നിക്ഷേപമെന്നാണ് ആര്‍ബിഐയുടെ മുന്നറിയിപ്പ്.

malayalam.goodreturns.in