എമിറേറ്റ്‌സ് എയര്‍ലൈൻ ടിക്കറ്റുകൾ ബുക്ക് ചെയ്ത യാത്രക്കാർ വിമാനത്താവളത്തില്‍ നേരത്തെ എത്തിച്ചേരണമെന്ന് എമിറേറ്റ്‌സ് എയര്‍ലൈന്‍. ക്രിസ്മസ്, പുതുവത്സരാഘോഷങ്ങളോടനുബന്ധിച്ച് തിരക്ക് വർദ്ധിച്ചതിനാലാണ് എമിറേറ്റ്‌സ് യാത്രക്കാർക്ക് മുന്നറിയിപ്പ് നൽകിയിരിക്കുന്നത്.

അവധി ആഘോഷിക്കാനായി വിദേശ രാജ്യങ്ങളിൽ നിന്ന് പതിനായിരക്കണക്കിന് ആളുകളാണ് സ്വന്തം നാട്ടിലേയ്ക്ക് ടിക്കറ്റ് ബുക്ക് ചെയ്തിരിക്കുന്നത്. ഡിസംബർ അവസാന ആഴ്ച്ചകളിൽ ദുബായ് ഇന്റർനാഷണൽ എയർപോർട്ടിൽ വൻ തിരക്ക് അനുഭവപ്പെടുമെന്ന് വിമാന കമ്പനികൾ പറയുന്നു.

ഏകദേശം 4,20,000 പേര്‍ ടെര്‍മിനല്‍ മൂന്നിൽ മാത്രമുണ്ടാകുമെന്ന് എമിറേറ്റ്‌സ് എയര്‍ലൈന്‍ അധികൃതർ പറഞ്ഞു. വെള്ളിയാഴ്ചയാകും ഏറ്റവും കൂടുതല്‍ തിരക്ക് അനുഭവപ്പെടുന്നതെന്നും ദുബായ് വിമാനത്താവളത്തിന് ചുറ്റും റോഡ് വികസന പ്രവര്‍ത്തനങ്ങള്‍ നടക്കുന്നതിനാല്‍ വാരാന്ത്യങ്ങളില്‍ യാത്ര ചെയ്യുന്നവര്‍ നേരത്തെ വിമാനത്താവളത്തില്‍ എത്തണമെന്നും എമിറേറ്റ്‌സ് നിര്‍ദേശിച്ചു.

ആറ് മണിക്കൂര്‍ മുമ്പ് തന്നെ ചെക്ക് ഇന്‍ കൗണ്ടറുകള്‍ തുറക്കും. യാത്രയ്ക്ക് ഒരു മണിക്കൂര്‍ മുന്‍പെങ്കിലും ചെക്ക് ഇന്‍ പൂര്‍ത്തിയാകാത്തവരെ യാത്ര ചെയ്യാന്‍ അനുവദിക്കില്ലെന്നും എമിറേറ്റ്‌സ് വ്യക്തമാക്കി.

malayalam.goodreturns.in