ഡിജിറ്റല്‍ കറന്‍സിയായ ബിറ്റ്കോയിനെക്കുറിച്ച് ജീവനക്കാര്‍ക്കിടയില്‍ അവബോധമുണ്ടാക്കുന്നതിന് ജപ്പാന്‍ കമ്പനി ശമ്പളം ഇനി ബിറ്റ്‌കോയിനായി നല്‍കും. ഓണ്‍ലൈന്‍ പരസ്യം, ഇന്റര്‍നെറ്റ് ഇന്‍ഫ്രാസ്‌ട്രെക്ചര്‍ തുടങ്ങിയ മേഖലയില്‍ പ്രവര്‍ത്തിക്കുന്ന ജിഎംഒ ഇന്റര്‍നെറ്റ് എന്ന കമ്പനിയാണ് പുതിയ പ്രഖ്യാപനവുമായി രം​ഗത്തെത്തിയിരിക്കുന്നത്.

അടുത്ത വര്‍ഷം ഫെബ്രുവരിയോടെ കമ്പനി തീരുമാനം നടപ്പിലാക്കും. ജപ്പാനിലെ ജീവക്കാര്‍ക്ക് മാത്രം ആയിരിക്കും ശമ്പളം ബിറ്റ്‌കോയിനായി നല്‍കുക. 4000 ജീവനക്കാര്‍ക്ക് പ്രഖ്യാപനം ബാധകമാകും.

എന്നാൽ, ജീവനക്കാര്‍ക്ക് താത്പര്യമുണ്ടെങ്കിൽ മാത്രം ബിറ്റ്‌കോയിനില്‍ ശമ്പളം സ്വീകരിച്ചാല്‍ മതിയെന്ന് കമ്പനി വക്താക്കളിൽ നിന്നുള്ള വിവരം. 2018 മെയ് മാസത്തോടെ ബിറ്റ്‌കോയിന്‍ ട്രെഡിം​ഗ്, എക്‌സ്‌ചേഞ്ച് എന്നീ ബിസിനസുകള്‍ തുടങ്ങാനും കമ്പനിക്ക് പദ്ധതിയുണ്ട്.

ജനുവരിയിൽ 1000 ഡോളർ മാത്രമായിരുന്നു ബിറ്റ് കോയിന്റെ മൂല്യം. എന്നാൽ ഈയാഴ്ച 17,000 ഡോളറായാണ് ബിറ്റ്കോയിൻ നിരക്ക് ഉയർന്നിരിക്കുന്നത്. വിവിധ രാജ്യങ്ങളിലെ കേന്ദ്രബാങ്കുകള്‍ ബിറ്റ്‌കോയിന്‍ ഇടപാടുകള്‍ ഇപ്പോഴും അംഗീകരിച്ചിട്ടില്ല. ആ‍ർബിഐയും ബിറ്റ്കോയിൻ ഇടപാടുകൾക്ക് ഇതുവരെ അനുമതി നൽകിയിട്ടില്ല.

malayalam.goodreturns.in