സംസ്ഥാനാന്തര ചരക്കു കൈമാറ്റത്തിനുള്ള ഇ-വേ ബിൽ ജിഎസ്ടി കൗൺസിൽ അം​ഗീകരിച്ചു. 2018 ഫെബ്രുവരി ഒന്നു മുതൽ ഇ-വേ ബിൽ നി‍ർബന്ധമാക്കും. നികുതി വെട്ടിപ്പു തടയുകയാണ് ബില്ലിന്റെ ലക്ഷ്യം.

ജി.എസ്.ടി. നിയമപ്രകാരം, 50,000 രൂപയിലധികം വിലയുള്ള സാധനങ്ങൾ ഒരു സംസ്ഥാനത്തിനകത്തിനോ പുറത്തേയ്ക്കോ കൊണ്ടു പോകുന്നതിന് മുൻകൂർ ഓൺലൈൻ രജിസ്ട്രേഷൻ അല്ലെങ്കിൽ ഇ-വേ ബിൽ നേടേണ്ടതുണ്ട്.

കേന്ദ്ര ധനമന്ത്രി അരുൺ ജയ്റ്റ്ലി അദ്ധ്യക്ഷനായുള്ള കമ്മിറ്റിയുടെ യോഗം വീഡിയോ കോൺഫറൻസിം​ഗ് വഴിയാണ് നടത്തിയത്. ദേശീയ ഇ-ബിൽ തയ്യാറാകുന്നതുവരെ, സ്വന്തം ഇ-വേ ബിൽ സമ്പ്രദായങ്ങൾ തുടരുന്നതിന് സംസ്ഥാനങ്ങൾക്ക് അധികാരമുണ്ടെന്ന് കൗൺസിൽ അറിയിച്ചു. ഏപ്രിൽ ഒന്നു മുതൽ രേഖകൾ അഖിലേന്ത്യാ തലത്തിൽ നടപ്പിലാക്കും.

ജനുവരി 16 മുതൽ പരീക്ഷണാടിസ്ഥാനത്തിൽ ഇ-വേ ബിൽ സമ്പ്രദായം നടപ്പിലാക്കുമെന്നും കൗൺസിൽ അറിയിച്ചു. കൗൺസിലിന്റെ 24-ാമത് യോഗമായിരുന്നു ഇത്. നവംബറിൽ നടന്ന യോഗത്തിൽ 178 ഉൽപന്നങ്ങളുടെ നികുതി വെട്ടിക്കുറച്ചിരുന്നു.

malayalam.goodreturns.in