സബ്സിഡി തുക ആധാര്‍ വഴി ബാങ്ക് അക്കൗണ്ടുമായി ബന്ധിപ്പിക്കുന്നതിന് ഉപഭോക്താവില്‍ നിന്ന് കൃത്യമായ സമ്മതം വാങ്ങണമെന്ന് കേന്ദ്രസര്‍ക്കാര്‍. ഇത് സംബന്ധിച്ച പുതിയ നിര്‍ദ്ദേശങ്ങള്‍ യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ പുറത്തിറക്കി.

ഉപഭോക്താവില്‍ നിന്ന് സമ്മതം വാങ്ങിയതിന് ശേഷം മാത്രം സബ്സിഡി തുക ആധാര്‍ വഴി ബാങ്ക് അക്കൗണ്ടുമായി ബന്ധിപ്പിക്കാവൂ എന്നാണ് യുഐഡിഎഐയുടെ നിർദ്ദേശം. ബാങ്ക് അക്കൗണ്ടുമായി ബന്ധിപ്പിക്കലല്ലാതെ മറ്റൊരു നടപടിയ്‌ക്കും ആധാര്‍ വിവരം ഉപയോഗിക്കരുതെന്നും അതോറിറ്റി വ്യക്തമാക്കിയിട്ടുണ്ട്.

എസ്.എം.എസ്, ഇ-മെയില്‍ എന്നിവയിലൂടെ അക്കൗണ്ട് മാറുന്ന വിശദാംശങ്ങള്‍ ബാങ്കുകള്‍ ഉപഭോക്താവിനെ അറിയിക്കണമെന്നും അതോറിറ്റി വ്യക്തമാക്കി.

ഉപഭോക്താക്കളുടെ സമ്മതമില്ലാതെ എയര്‍ടെല്‍ 190 കോടി രൂപ പെയ്മെന്‍റ് ബാങ്കിലേക്ക് മാറ്റിയെന്ന പരാതി ഉയര്‍ന്ന പശ്ചാത്തലത്തിലാണ് നടപടി. ഇതേത്തുടര്‍ന്ന് ഭാരതി എയര്‍ടെല്‍, എയര്‍ടെല്‍ പേയ്മെന്റ്സ് ബാങ്ക് എന്നിവയുടെ ആധാര്‍ അധിഷ്‌ഠിത ഇ-കെ.വൈ.സി. അനുമതി യുണീക്ക് ഐഡന്‍ഡിഫിക്കേഷന്‍ അതോറിറ്റി റദ്ദാക്കിയിരുന്നു.

malayalam.goodreturns.in