മഹാത്മഗാന്ധി സീരീസില്പ്പെട്ട പുതിയ പത്ത് രൂപ നോട്ടുകൾ പുറത്തിറക്കാനൊരുങ്ങി റിസര്വ് ബാങ്ക് ഓഫ് ഇന്ത്യ. ചോക്ലേറ്റ് നിറത്തിലാകും നോട്ടുകൾ പുറത്തിറക്കുക. 10 രൂപയുടെ 100 കോടി നോട്ടുകള് അച്ചടിച്ചു കഴിഞ്ഞതായാണ് വിവരം.
ചോക്ലേറ്റ് ബ്രൗണ് കളറിലുള്ള നോട്ടില് കൊണാര്ക് സൂര്യക്ഷേത്രത്തിന്റെ ചിത്രവും പതിച്ചിട്ടുണ്ട്. പുതിയ ഡിസൈന് കഴിഞ്ഞയാഴ്ചയാണ് സര്ക്കാര് അംഗീകരിച്ചത്.
2005ലാണ് അവസാനമായി പത്ത് രൂപയുടെ ഡിസൈന് മാറ്റിയത്. ഓഗസ്റ്റിൽ മഹാത്മാ ഗാന്ധി സീരീസിലുള്ള പുതിയ 200, 50 രൂപയുടെ നോട്ടുകളും ആർബിഐ അവതരിപ്പിച്ചിരുന്നു. കഴിഞ്ഞ വര്ഷം നവംബറില് 500, 1000 രൂപാ നോട്ടുകള് നിരോധിച്ചതിന് പിന്നലെയാണ് 2000ത്തിന്റെ നോട്ടുകള് പുറത്തിറക്കിയത്.
പുതുതായി രൂപകല്പന ചെയ്ത 50ന്റെയും 200ന്റെയും 500ന്റെയും നോട്ടുകളും വിപണിയിലെത്തിയിരുന്നു. റിസർവ് ബാങ്ക് ഓഫ് ഇന്ത്യ പുതുതായി പുറത്തിറക്കിയ 200 രൂപയുടെ നോട്ടുകൾ എടിഎമ്മുകളിൽ എത്താൻ വൈകുമെന്ന് സൂചന നൽകിയിരുന്നു. 200 രൂപ നോട്ടുകളുടെ നീളത്തിൽ വ്യത്യാസമുള്ളതിനാൽ എടിഎം മെഷീനുകൾ ഇതിനായി പുനർ സജ്ജീകരിക്കേണ്ടിവരുമെന്നതിനാലാണ് ഇത്.
malayalam.goodreturns.in