സംസ്ഥാനത്ത് റബ്ബർ വിലയിൽ വൻ ഇടിവ്. രണ്ടാഴ്ചക്കിടെ അ‍ഞ്ചു രൂപയോളമാണ് റബ്ബർ വില കുറഞ്ഞത്. ഉൽപ്പാദനം കുറഞ്ഞതിന് ഒപ്പം വില കൂടി ഇടിഞ്ഞതോടെ കർഷകർ പ്രതിസന്ധിയിലാണ്.

ഈ മാസം ആദ്യം 131 രൂപയായിരുന്നു ആർഎസ്എസ് നാലാം ഗ്രേഡ് റബ്ബറിന്റെ വില. അഞ്ചാം ഗ്രേഡിന് 127 രൂപയും. എന്നാൽ ഇപ്പോൾ ആർഎസ്എസ് നാലാം ഗ്രേഡിന് 126 ഉം അഞ്ചാം ഗ്രേഡിന് 121 ഉമായി വില കുറഞ്ഞു. ഇതിൽ നിന്ന് മൂന്നു രൂപയോളം കുറച്ചാണ് കർഷകർക്ക് ലഭിക്കുന്നത്.

അന്താരാഷ്ട്ര മാർക്കറ്റിൽ വിലയിടിഞ്ഞതാണ് ആഭ്യന്തര മാർക്കിറ്റിലെയും വിലയിടിവിന് കാരണമെന്ന് വ്യാപാരികൾ പറയുന്നു. ഉയർന്ന വിലയ്‍ക്ക് റബ്ബർ സംഭരിച്ച കച്ചവടക്കാർ വിറ്റഴിക്കാനാവാതെ വിഷമിക്കുകയാണ്.

ടയർ ലോബികളുടെ ഇടപെടലും വിലയിടിവിന് കാരണമാണെന്ന് കർഷകർ പറയുന്നു. എല്ലാ വർഷവും ഏറ്റവും കൂടുതൽ വില ലഭിക്കുന്ന സമയമാണിത്. എന്നാൽ ഇത്തവണ കർഷകർ തിരിച്ചടി നേരിടുകയാണ്.

malayalam.goodreturns.in