സംസ്ഥാനത്ത് ഊബര്‍ മാതൃകയിൽ ആംബുലന്‍സ് സംവിധാനം ഏര്‍പ്പെടുത്തുമെന്ന് ധനമന്ത്രി തോമസ് ഐസക്ക് ബജറ്റിൽ പ്രഖ്യാപിച്ചു. തമിഴ്‍നാട് സ്വദേശി, മുരുകന്‍ പണമില്ലാത്തതുകൊണ്ട് അപകട ചികിത്സ ലഭിക്കാതെ മരണമടഞ്ഞത് കേരളത്തിന് അപമാനമാണെന്നും ഇത്തരം സംഭവങ്ങൾ ആവര്‍ത്തിക്കാതിരിക്കാനുള്ള ബദല്‍ സംവിധാനം ഈ സാമ്പത്തിക വർഷം നടപ്പിലാക്കുമെന്നും അദ്ദേഹം വ്യക്തമാക്കി.

അപകടസ്ഥാനത്ത് നിന്ന് പ്രത്യേക മൊബൈല്‍‌ ആപ്പില്‍ സന്ദേശം നല്‍കിയാല്‍ ഏറ്റവും അടുത്ത ആംബുലന്‍സ് സേവനം ലഭിക്കുന്ന തരത്തിലാകും സംവിധാനം. ഇങ്ങനെ ആംബുലൻസ് എത്തുമ്പോൾ ഏറ്റവും അടുത്തുള്ള ചികിത്സാ കേന്ദ്രങ്ങളിൽ രോഗികളെ എത്തിക്കാൻ സാധിക്കും.

കൂടാതെ ഇങ്ങനെ എത്തിക്കുന്നവർക്ക് സ്വകാര്യ ആശുപത്രികളടക്കം സൗജന്യ അടിയന്തര ചികിത്സ ലഭ്യമാക്കേണ്ടതാണ്. ഇന്‍ഷ്വറന്‍സ് വഴി അവര്‍ക്ക് പിന്നീട് പണം ലഭ്യമാക്കും.

ഇതിനാവശ്യമായ പണം റോഡ് സേഫ്‍ടി ഫണ്ടില്‍ നിന്നാണ് കണ്ടെത്തുക. പൊതു ആരോഗ്യ സര്‍വ്വീസസിന് 1685.70 കോടി രൂപയാണ് പദ്ധതിയില്‍ വകയിരുത്തിയിരിക്കുന്നത്.

malayalam.goodreturns.in