രാജ്യത്തെ കാര്‍ട്ടൂണ്‍ ചാനലുകളില്‍ കോളയുടെയും ജങ്ക് ഫുഡ്സിന്റെയും പരസ്യങ്ങള്‍ക്ക് കേന്ദ്രസര്‍ക്കാര്‍ വിലക്കേര്‍പ്പെടുത്തി. വിവരസാങ്കേതിക സഹമന്ത്രി രാജ്യവര്‍ധന്‍ സിംഗ് റാത്തോഡാണ് ഇക്കാര്യം പാര്‍ലമെന്റില്‍ അറിയിച്ചത്.

കുട്ടികൾക്കിടയിൽ ആരോഗ്യകരമായ ഭക്ഷണ സാധനങ്ങൾ പ്രോത്സാഹിപ്പിക്കുന്നതിന്റെ ഭാ​ഗമാണ് പരസ്യങ്ങളുടെ നിരോധനം. ആരോഗ്യത്തിന് ഹാനികരമായ തരത്തിലുള്ള ഇത്തരം ഭക്ഷണസാധനങ്ങള്‍ കഴിക്കുന്നതില്‍ നിന്ന് കുട്ടികളെ പിന്തിരിപ്പിക്കുകയാണ് സർക്കാരിന്റെ ലക്ഷ്യം. ഇത് സംബന്ധിച്ച് ഉടന്‍ തന്നെ ടെലിവിഷന്‍ ചാനലുകള്‍ക്ക് നോട്ടീസ് നല്‍കുമെന്നും റാത്തോഡ് അറിയിച്ചു.

ചില ടിവി റിപ്പോർട്ടുകൾ പ്രകാരം കാർട്ടൂൺ ചാനലുകളിൽ പരസ്യങ്ങൾ പ്രദർശിപ്പിക്കുന്നതിൽ ഒൻപത് കമ്പനികളെ ഒഴിവാക്കിയിട്ടുണ്ടെന്നാണ് വിവരം. ഹിന്ദുസ്ഥാൻ യൂണിലിവർ, നെസ്‍ലെ തുടങ്ങിയ കമ്പനികൾ സർക്കാരിന്റെ പുതിയ ഉത്തരവ് അംഗീകരിച്ചു.

കഴിഞ്ഞ വര്‍ഷം അവസാനം ഇത്തരത്തില്‍ കുട്ടികള്‍ക്ക് കാണാന്‍ യോജിച്ചതല്ലെന്ന കാരണത്താല്‍ ഗര്‍ഭനിരോധന ഉറയുടെ പരസ്യം രാവിലെ ആറിനും രാത്രി പത്തിനും ഇടയില്‍ പ്രദര്‍ശിപ്പിക്കരുതെന്ന് കേന്ദ്രം നിര്‍ദേശിച്ചിരുന്നു.

malayalam.goodreturns.in