ഇന്റര്‍നെറ്റ് സേർച്ച് എഞ്ചിൻ സൈറ്റുകളില്‍ ഏറ്റവും പ്രശസ്തമായ ഗൂഗിളിന് 136 കോടി പിഴ. തിരച്ചില്‍ ഫലങ്ങളില്‍ തിരിമറിയും പക്ഷാപാതവും കാണിക്കുന്നുവെന്ന് ആരോപിച്ച പരാതികളിലാണ് പിഴ നൽകിയത്. കോംപറ്റീഷന്‍ കമ്മീഷന്‍ ഓഫ് ഇന്ത്യയാണ് പിഴ വിധിച്ചത്.

2013-15 കാലത്ത് ഇന്ത്യയില്‍നിന്നുള്ള ഗൂഗിളിന്റെ വരുമാനത്തിന്റെ അഞ്ചു ശതമാനമാണ് പിഴ തുകയായി നിശ്ചയിച്ചത്. ഡി.കെ. സിക്രി അദ്ധ്യക്ഷനായ കമ്മിഷനാണ് പിഴ തുക നിശ്ചയിച്ചത്.

കമ്പനി 60 ദിവസത്തിനകം പിഴ അടക്കണം. ഗൂഗിളിന്റെ വാദങ്ങളും കമ്മിഷൻ പരിഗണിച്ചിരുന്നു. എന്നാൽ ഒടുവിൽ കുറ്റം കണ്ടെത്തിയതിനെ തുടർന്ന് പിഴ വിധിക്കുകയായിരുന്നു.

വ്യാപാര താത്പര്യത്തിനനുസരിച്ച് ചില കമ്പനികളെ തിരച്ചില്‍ ഫലങ്ങളില്‍ മുന്നിലെത്തിക്കുന്നുവെന്ന് മുമ്പും ഗൂഗിളിനെതിരെ പരാതി ഉയർന്നിട്ടുണ്ട്. കഴിഞ്ഞ ജൂണില്‍ യൂറോപ്യന്‍ കമ്മിഷന്‍ ഗൂഗിളിന് 242 കോടി യൂറോ (ഏകദേശം 17,500 കോടി രൂപ) പിഴ വിധിച്ചിരുന്നു. വിവിധ രാജ്യങ്ങളിൽ ഗൂഗിളിനെതിരെ സമാനമായ പരാതികളുണ്ട്.