പ്രമുഖ ഐടി കമ്പനിയായ കൊഗ്നിസന്റിന്റെ ബാങ്ക് അക്കൌണ്ടുകൾ മരവിപ്പിച്ചു. നികുതി കുടിശ്ശിക അടയ്ക്കാത്തതിനെ തുടർന്നാണ് കൊഗ്നിസന്റ് ടെക്നോളജി സൊല്യൂഷൻസ് കോർപ്പറേഷന്റെ ബാങ്ക് അക്കൌണ്ടുകൾ ആദായ നികുതി വകുപ്പ് മരവിപ്പിച്ചത്.

2500 കോടി രൂപയാണ് നികുതി ഇനത്തിൽ കമ്പനി അടയ്ക്കാനുള്ളതെന്നാണ് പുറത്തു വന്നിരിക്കുന്ന റിപ്പോർട്ട്. കമ്പനിയുടെ മുംബൈയിലും ചെന്നൈയിലുമുള്ള ബാങ്ക് അക്കൌണ്ടുകളാണ് ഇതേ തുടർന്ന് മരവിപ്പിച്ചിരിക്കുന്നത്.

ഡിവിഡന്റ് ഡിസ്ട്രിബ്യൂഷൻ ടാക്സ് അടയ്ക്കുന്ന കാര്യത്തിലാണ് കൊഗ്നിസന്റ് വീഴ്ച്ച വരുത്തിയത്. ഇതിനെ തുടർന്നാണ് ആദായ നികുതി വകുപ്പിന്റെ നടപടി.

ബാങ്ക് അക്കൌണ്ടുകൾ മരവിപ്പിച്ച കാര്യം കമ്പനിയുടെ വക്താവ് സ്ഥിരീകരിച്ചു. എന്നാൽ ഇതിന്മേൽ കൂടുതൽ നടപടികൾ ഉണ്ടാകില്ലെന്നും ഇത് കോടതി വിലക്കിയിട്ടുണ്ടെന്നും കമ്പനി വക്താവ് വ്യക്തമാക്കി. അമേരിക്കൻ കമ്പനിയായ കൊഗ്നിസന്റിന് ഇന്ത്യയിൽ നിരവധി സ്ഥലങ്ങളിൽ ബിസിനസുകളുണ്ട്. 2.6 ലക്ഷം ജീവനക്കാരാണ് കൊഗ്നിസന്റിന് ഇന്ത്യയിലുള്ളത്.

malayalam.goodreturns.in