പത്ത് വര്‍ഷത്തിന് ശേഷം കൊച്ചി തുറമുഖം വീണ്ടും ലാഭത്തിൽ. കഴിഞ്ഞ സാമ്പത്തിക വര്‍ഷം നാല് കോടിയുടെ പ്രവര്‍ത്തന ലാഭമാണ് കൊച്ചിൻ പോര്‍ട്ടിനുണ്ടായിരിക്കുന്നത്.

പ്രവര്‍ത്തന ചെലവ് കുറക്കാന്‍ കഴിഞ്ഞതും ചരക്ക് നീക്കത്തില്‍ വര്‍ദ്ധനവുണ്ടായതുമാണ് പോര്‍ട്ട് ട്രസ്റ്റിനെ ലാഭത്തിലെത്തിച്ചതെന്ന് കൊച്ചിന്‍ പോര്‍ട്ട് ട്രസ്റ്റ് ചെയര്‍മാന്‍ പി രവീന്ദ്രന്‍ പറഞ്ഞു. ചരക്ക് നീക്കത്തില്‍ രാജ്യത്തെ മറ്റ് തുറമുഖങ്ങളെക്കാള്‍ നേട്ടം കൈവരിക്കാനും കൊച്ചി തുറമുഖത്തിന് കഴിഞ്ഞു.

29.14 മില്യണ്‍ മെട്രിക് ടണ്‍ ചരക്ക് നീക്കമാണ് കഴിഞ്ഞ സാമ്പത്തിക വര്‍ഷം കൊച്ചി തുറമുഖം വഴി നടന്നത്. 2016- 17 സാമ്പത്തിക വര്‍ഷം ഇത് 25.01 മില്യണ്‍ മെട്രിക് ടണ്ണായിരുന്നു.

1144 ചരക്ക് കപ്പലുകളാണ് ഇക്കാലയളവില്‍ കൊച്ചിയിലെത്തിയത്. 42 യാത്രാ കപ്പലുകളും തുറമുഖത്ത് എത്തി. കണ്ടെയ്‌നറുകള്‍ കൈകാര്യം ചെയ്യുന്നതില്‍ 13 ശതമാനം വര്‍ദ്ധനവും കഴിഞ്ഞ സാമ്പത്തിക വര്‍ഷം തുറമുഖ ട്രസ്റ്റ് നേടിയിരുന്നു.

malayalam.goodreturns.in