ജോലി അന്വേഷിക്കുന്നവർക്ക് സന്തോഷ വാർത്ത. തൊഴിലന്വേഷകർക്ക് തുണയായി ജോബ് സേർച്ച് ഫീച്ചറുമായി ടെക് ഭീമൻ ഗൂഗിൾ. എല്ലാ തരത്തിലുള്ള തൊഴിലവസരങ്ങളെപ്പറ്റിയും ഇനി ഗൂഗിൾ നിങ്ങൾക്ക് വിവരം നൽകും.
അമേരിക്കയിൽ കഴിഞ്ഞ വർഷം അവതരിപ്പിച്ചു
ഗൂഗിളിന്റെ ഈ പുതിയ ഫീച്ചർ കഴിഞ്ഞ ദിവസമാണ് ഗൂഗിൾ ഇന്ത്യയിൽ അവതരിപ്പിച്ചത്. ഒരു വർഷം മുമ്പ് അമേരിക്കയിൽ ഈ ഫീച്ചർ അവതരിപ്പിച്ചിരുന്നു. ലിങ്ക്ഡിൻ, ഷൈൻ.കോം, ക്വിക്കർ, വിസ്ഡം ജോബ്സ് തുടങ്ങിയ മറ്റ് തൊഴിൽ തിരയൽ പ്ലാറ്റ്ഫോമുകളുമായി ചേർന്നാണ് ഗൂഗിൾ പുതിയ പദ്ധതി ആരംഭിച്ചിരിക്കുന്നത്.
തൊഴിലന്വേഷകന്റെ സ്ഥലം, ഇഷ്ട മേഖലകൾ തുടങ്ങിയവയൊക്കെ രേഖപ്പെടുത്താനുള്ള സൗകര്യമുണ്ട്. ഇതനുസരിച്ച് അനുയോജ്യമായ തൊഴിലവസരം കണ്ടെത്താൻ ഗൂഗിൾ തൊഴിലന്വേഷകരെ സഹായിക്കുമെന്ന് ഗൂഗിളിന്റെ സോഫ്റ്റ്വെയർ എൻജിനീയറിംഗ് ടീം തലവൻ അജിന്റ് ശ്രീവാസ്തവ പറഞ്ഞു.
സേവനം ഇംഗ്ലീഷിൽ
ഇംഗ്ലീഷിലാണ് ഈ സേവനം ലഭ്യമാകുക. ഡെസ്ക്ടോപ്പ് വഴിയും മൊബൈൽ ഫോൺ വഴിയും ഇത് പ്രയോജനപ്പെടുത്താം. വളരെ ലളിതമായ രീതിയിലാണ് ജോലി തിരയൽ സേവനം തയ്യാറാക്കിയിരിക്കുന്നത്. ഗൂഗിൾ ജോബ്സ് പോർട്ടൽ മറ്റ് ജോബ് പോർട്ടലുകളിൽ നിന്ന് വ്യത്യസ്തമാണ്. മുൻകൂട്ടി ജോബ് ലിസ്റ്റിംഗ് നടത്താതെയാണ് തൊഴിലന്വേഷകർക്ക് അനുയോജ്യമായ ജോലി കണ്ടെത്തി നൽകുന്നത്.
malayalam.goodreturns.in