വിമാന യാത്രക്കാർക്ക് സന്തോഷ വാർത്ത. ഇനി വിമാന യാത്രക്കിടയിൽ ഫോൺ ഉപയോഗിക്കാതെ കഷ്ട്ടപ്പെട്ടേണ്ട. ആകാശത്തിരുന്നും ഫോൺ വിളിക്കുന്നതിനുള്ള സൗകര്യമൊരുക്കുകയാണ് ടെലികോം കമ്മീഷൻ.

ഇന്ത്യൻ എയർസ്പേസിൽ മൂന്ന് നാലു മാസത്തിനുള്ളിൽ ഈ സൗകര്യം നടപ്പിലാക്കുകയാണ് ടെലികോം കമ്മീഷന്‍റെ ലക്ഷ്യം. കപ്പൽ യാത്രകളിൽ ഫോൺ വിളിക്കാനും ഇന്‍റർനെറ്റ് ഉപയോഗിക്കാനുമുള്ള അനുമതി ടെലികോം മന്ത്രാലയം ഇതിനോടകം നൽകി കഴിഞ്ഞു.

മൂന്നോ നാലോ മാസത്തിനകം തന്നെ യാത്രക്കാർക്ക് ഈ സൗകര്യം ലഭ്യമാകുമെന്നാണ് വിവരം. ടെലികോം കമ്മീഷനുമായി രണ്ട് മണിക്കൂർ നീണ്ടു നിന്ന യോഗത്തിനുശേഷം സെക്രട്ടറി അരുണ സുന്ദർരാജനാണ് ഇക്കാര്യം മാധ്യമങ്ങളെ അറിയിച്ചത്. നിലവിൽ ഇന്ത്യൻ വ്യോമാതിർത്തിക്കുള്ളിൽ മൊബൈൽ ഫോണോ ഇന്‍റർനെറ്റോ ഉപയോഗിക്കാൻ അനുവാദമില്ല.

രാജ്യാന്തര തലത്തിൽ പല വിമാനക്കമ്പനികളും വൈ - ഫൈ ഉപയോഗിക്കാൻ യാത്രാക്കാരെ അനുവദിക്കുന്നുണ്ടെങ്കിലും ഇന്ത്യൻ വ്യോമാതിർത്തിയിലെത്തുമ്പോൾ സ്വിച്ച് ഓഫ് ചെയ്യുകയാണ് പതിവ്. വൈ- ഫൈ ഉപയോഗിക്കാൻ അനുമതി നൽകുന്നത് ഏവിയേഷൻ മാർക്കറ്റിലെ കടുത്ത മത്സരത്തിനിടയിൽ കമ്പനികൾക്ക് ഗുണം ചെയ്യുമെന്നാണ് കരുതപ്പെടുന്നത്.

malayalam.goodreturns.in