രാജ്യത്ത് പെട്രോള്‍ - ഡീസല്‍ വിലയില്‍ വീണ്ടും വര്‍ദ്ധനവ്. പെട്രോളിന് 23 പൈസയും ഡീസലിന് 24 പൈസയുമാണ് ഇന്ന് വ‍ർദ്ധിച്ചത്. അടുത്ത ദിവസങ്ങളില്‍ കൂടി വര്‍ദ്ധനവ് തുടര്‍ന്നാല്‍ ഈ ആഴ്ച്ച തന്നെ കേരളത്തില്‍ പെട്രോള്‍ വില 80 കടന്നേക്കും.

തുടര്‍ച്ചയായി നാലാം ദിവസമാണ് ഇന്ധന വിലയില്‍ വർദ്ധനവ് രേഖപ്പെടുത്തുന്നത്. കര്‍ണാടക തിരഞ്ഞെടുപ്പിനെ തുടര്‍ന്ന് 19 ദിവസത്തോളം ഇന്ധന വില വര്‍ദ്ധിച്ചിരുന്നില്ല.

എന്നാൽ ഇലക്ഷൻ കഴിഞ്ഞ് രണ്ട് ദിവസം കഴിഞ്ഞപ്പോഴേക്കും വില ഉയരാൻ തുടങ്ങി. ഏപ്രില്‍ 24-ന് ശേഷം ആഗോള വിപണിയില്‍ എണ്ണ വിലയില്‍ ഗണ്യമായ വര്‍ദ്ധനവുണ്ടായിട്ടും ഇലക്ഷനോടനുബന്ധിച്ച് അതിനനുസൃതമായി മാറ്റം എണ്ണ കമ്പനികള്‍ വരുത്തിയിരുന്നില്ല.

ഇത്രയും ദിവസം വില വർദ്ധനവ് നിർത്തലാക്കിയതോടെ പൊതുമേഖലാ എണ്ണ കമ്പനികൾക്ക് 500 കോടി രൂപയുടെ നഷ്ടം നേരിട്ടതായാണ് കണക്ക്. ഇത്രയും ദിവസം വില ഉയർത്താതിരുന്നതിന്റെ നഷ്ടം എണ്ണ കമ്പനികൾ നികത്തുന്നതിന്റെ ഭാഗമാണ് ഇപ്പോഴത്തെ വില വർദ്ധനവ്. അതുകൊണ്ട് തന്നെ വരും ദിവസങ്ങളിലും പെട്രോൾ, ഡീസൽ വില കുതിച്ചുയരാനാണ് സാധ്യതയെന്ന് അധികൃതർ വ്യക്തമാക്കുന്നു.

malayalam.goodreturns.in