20 പുതിയ ആഭ്യന്തര സര്‍വീസുകള്‍ ആരംഭിക്കാന്‍ ഒരുങ്ങി ഇന്‍ഡിഗോ വിമാന കമ്പനി. ജൂലൈ ഒന്ന് മുതലാകും പുതിയ സര്‍വീസുകള്‍ ആരംഭിക്കുക.

ബംഗളൂരു - വാരണാസി, ബംഗളൂരു-ചണ്ഡീഗഡ്, റാഞ്ചി- ബംഗളൂരു, ഇന്‍ഡോര്‍- ബംഗളൂരു എന്നിവിടങ്ങളിലേക്കാണ് പുതിയ സര്‍വീസുകള്‍ ആരംഭിക്കുന്നത്. ചണ്ഡീഗഡ് - ശ്രീനഗർ, ഇൻഡോർ - നാഗ്പൂർ സർവ്വീസുകളും ആരംഭിക്കാൻ പദ്ധതിയുണ്ട്. ഇവിടേയ്ക്ക് ദിവസേനയുള്ള സർവ്വീസിനാണ് കമ്പനി പദ്ധതിയിടുന്നത്.

ജൂണ്‍ 28ന് കൊച്ചി- തിരുച്ചിറപ്പള്ളി,തിരുച്ചിറപ്പള്ളി- ബംഗളൂരു എന്നിവിടങ്ങളിലേക്ക് നിരക്ക് കുറഞ്ഞ സര്‍വീസുകളും ഉണ്ട്. ജൂലൈ 15 മുതല്‍ കൊല്‍ക്കത്ത-ചണ്ഡീഗഢ്, കൊല്‍ക്കത്ത - ഇന്‍ഡോര്‍, ചണ്ഡീഗഡ്-ശ്രീനഗര്‍ എന്നിവടങ്ങളിലേക്ക് ഇന്‍ഡിഗോയുടെ നേരിട്ടുള്ള സര്‍വീസുകളും തുടങ്ങും.

നിലവിലുള്ള സര്‍വീസുകള്‍ക്ക് പുറമെയാണ് പുതിയ സര്‍വീസുകള്‍ തുടങ്ങുന്നത്. മെൽബൺ ആസ്ഥാനമായുള്ള മൾട്ടിമോഡൽ ട്രാവൽ പ്ലാനിംഗ്
വെബ്സൈറ്റ് റോം 2 റിയോയുടെ റിപ്പോർട്ട് അനുസരിച്ച് ലോകത്തിലെ ഏറ്റവും ചെലവ് കുറഞ്ഞ 10 വിമാനങ്ങളുടെ ലിസ്റ്റിൽ അഞ്ചാം സ്ഥാനമാണ് ഇൻഡിഗോയ്ക്കുള്ളത്. ലിസ്റ്റിൽ ഉൾപ്പെട്ട മറ്റൊരു ഇന്ത്യൻ കമ്പനി എയർ ഇന്ത്യ എക്സ്പ്രസാണ്. ജെറ്റ് എയർവെയ്സിന് 12-ാം സ്ഥാനവും എയർ ഇന്ത്യയ്ക്ക് 13-ാം സ്ഥാനവുമാണുള്ളത്.