2018-19 സാമ്പത്തിക വർഷത്തിൽ ഇന്ത്യൻ സമ്പദ്വ്യവസ്ഥ 7.3 ശതമാനം വളർച്ച കൈവരിക്കുമെന്നും അതിന് ശേഷമുള്ള രണ്ട് വർഷത്തിനുള്ളിൽ 7.5 ശതമാനം വളർച്ച നേടുമെന്നും ലോകബാങ്കിന്റെ പ്രവചനം. 

ലോകത്തിലെ അതിവേഗം വളരുന്ന സമ്പദ്വ്യവസ്ഥകളുടെ പട്ടികയിൽ രാജ്യവും ഉൾപ്പെടുമെന്നും ലോകബാങ്ക് വ്യക്തമാക്കി. ഗ്ലോബൽ ഇക്കണോമിക് പ്രോസ്‌പെക്ട്‌ റിപ്പോർട്ടിലാണ് ലോകബാങ്ക് പരാമർശം നടത്തിയിരിക്കുന്നത്.

ഇന്ത്യൻ സമ്പദ് വ്യവസ്ഥ ഇപ്പോൾ ശക്തവും സുസ്ഥിരമായ വളർച്ച കൈവരിക്കാൻ പര്യാപ്തമാണ്. ലോകത്തിലെ വളർന്നു കൊണ്ടിരിക്കുന്ന സമ്പദ്ഘടനകളിൽ ഇന്ത്യയാണ് ഒന്നാം സ്ഥാനത്തെന്നും ലോക ബാങ്ക് ഡവലപ്‌മെന്റ് പ്രോസ്‌പെക്ട്‌സ് ഗ്രൂപ്പ് ഡയറക്ടർ അയ്ഹാൻ കോസ് വ്യക്തമാക്കി.

2018 ജനുവരി മുതൽ ഇന്ത്യയുടെ വളർച്ചാ അനുമാനത്തിൽ മാറ്റമില്ല. ഉപഭോഗം വർദ്ധിച്ചതും നിക്ഷേപങ്ങൾ ഉയർന്നതും ഇന്ത്യയുടെ സമ്പദ്ഘടനയ്ക്ക് ഗുണകരമാകുമെന്നാണ് വിലയിരുത്തൽ. എന്നാൽ ചൈനയുടെ വളർച്ച കഴിഞ്ഞ വർഷത്തെ 6.9 ശതമാനത്തിൽ നിന്ന് ഇത്തവണ 6.5 ആയി കുറയാൻ സാധ്യതയുണ്ടെന്നാണ് വിവരം. 2019ൽ ഇത് 6.3 ശതമാനവും 2020ൽ 6.2 ശതമാനവുമായി മാറിയേക്കും.

malayalam.goodreturns.in