ബംഗളൂരുവിലെ കെമ്പെഗൗഡ ഇന്റർനാഷണൽ എയർപോർട്ടിൽ (കിഐഎ) നിന്നുള്ള ആഭ്യന്തര, അന്തർദ്ദേശീയ വിമാനയാത്രാ നിരക്കുകൾ ഉടൻ കുറയും. യാത്രയ്ക്കാരിൽ നിന്ന് ഈടാക്കുന്ന യൂസർ ഡെവലപ്മെന്റ് ഫീസിൽ (യുഡിഎഫ്) 74 ശതമാനം കുറവ് വരുത്താനാണ് തീരുമാനം. ഇത് ടിക്കറ്റ് നിരക്കുകളിലും കുറവുണ്ടാക്കും.

എയർപോർട്ട്സ് ഇക്കണോമിക് റഗുലേറ്ററി അതോറിറ്റി ഓഫ് ഇന്ത്യ (എഇആർഎ) ആണ് ഈ നിർദ്ദേശം മുന്നോട്ടു വച്ചത്. നിലവിൽ രാജ്യത്തെ ഏറ്റവും കൂടുതൽ ചാർജുകൾ ഈടാക്കുന്ന എയർപോർട്ടുകളിൽ ഒന്നാണ് കെമ്പെഗൗഡ ഇന്റർനാഷണൽ എയർപോർട്ട്.

ഇന്റ‍ർനാഷണൽ യാത്രക്കാ‍ർ യൂസർ ഡെവലപ്മെന്റ് ഫീസായി 1,226 രൂപയും ആഭ്യന്തര യാത്രക്കാ‍ർ 306 രൂപയുമാണ് ടിക്കറ്റ് ചാ‌‍‍ർജിനൊപ്പം നൽകേണ്ടത്. എന്നാൽ ഓഹരി ഉടമകളുടെ അഭിപ്രായം കൂടി അടിസ്ഥാനമാക്കിയുള്ള അന്തിമ നിരക്ക് നിരക്ക് ഉടൻ പുറത്തുവിടും.

ജൂണ് 25 ആണ് ഓഹരി ഉടമകൾക്ക് അഭിപ്രായം രേഖപ്പെടുത്താനുള്ള അവസാന ദിനം. ഈ നടപടികൾ പൂ‍ർത്തിയായാൽ ജൂലായ് ഒന്നു മുതൽ പുതിയ യൂസർ ഡെവലപ്മെന്റ് ഫീസ് നിലവിഷ വരും. ഇത് നിരവധി യാത്രക്കാർക്ക് ​ഗുണകരമാകുകയും ചെയ്യും. എയ‍ർപോ‍ർട്ടിലെ പാർക്കിം​ഗ്, ലാൻഡിംഗ് ചാർജുകൾ കുറയ്ക്കുന്നത് സംബന്ധിച്ചും എഇആർഎ നിർദ്ദേശം മുന്നോട്ടു വച്ചിട്ടുണ്ട്.

malayalam.goodreturns.in