ഐസിഐസിഐ ബാങ്കിന്റെ പാർട്ട് ടൈം നോൺ എക്സിക്യൂട്ടീവ് ചെയർമാനായി ഗിരീഷ്ചന്ദ്ര ചതുർവേദിയെ തെരഞ്ഞെടുത്തു. ജൂലൈ ഒന്ന് മുതൽ ഇദ്ദേഹം ജോലിയിൽ പ്രവേശിക്കും. മൂന്ന് വർഷ കാലാവധിയിലേയ്ക്കാണ് നിയമനം.
ഉത്തർപ്രദേശ് കേഡർ ഐഎഎസുകാരനായ ചതുർവേദി ധനമന്ത്രാലയത്തിൽ ബാങ്കു കാര്യങ്ങൾ നോക്കുന്ന അഡീഷണൽ സെക്രട്ടറിയായി പ്രവർത്തിച്ചിട്ടുണ്ട്. പെട്രോളിയം സെക്രട്ടറിയായാണ് വിരമിച്ചത്.
ചെയർമാൻ എം.കെ. ശർമ വിരമിക്കുന്ന ഒഴിവിലേക്കാണ് ചതുർവേദി ഇപ്പോൾ നിയമിതനായിരിക്കുന്നത്. ഇന്ന് ശർമ്മയുടെ മൂന്ന് വർഷ കാലാവധി അവസാനിക്കും. ലണ്ടൻ സ്കൂൾ ഓഫ് ഇക്കണോമിക്സിൽ നിന്ന് മാസ്റ്റേഴ്സും ഓക്സ്ഫോഡ് യൂണിവേഴ്സിറ്റിയിൽ നിന്ന് ധനശാസ്ത്രത്തിൽ ഡോക്ടറേറ്റും നേടിയിട്ടുള്ള വ്യക്തിയാണ് ഇദ്ദേഹം.
കാനറാ ബാങ്ക്, ബാങ്ക് ഓഫ് ബറോഡ, ഐഡിബിഐ ബാങ്ക് എന്നിവയിൽ ഡയറക്ടറായിരുന്നു. വീഡിയോകോൺ ഗ്രൂപ്പിനു വായ്പ അനുവദിച്ചതിൽ അഴിമതി ആരോപണം ഉയർന്നതിനെ തുടർന്ന് ഐസിഐസിഐ ബാങ്ക് എംഡിയും സിഇഒയുമായ ചന്ദ കോച്ചർ അനിശ്ചിതകാല അവധിയിലാണ്. ചീഫ് ഓപ്പറേറ്റിംഗ് ഓഫീസർ സന്ദീപ് ബക്ഷിയാണ് സിഇഒയുടെ ചുമതലകൾ നിർവഹിക്കുന്നത്. ചെയർമാനായി ചതുർവേദിയുടെ പേര് നിർദ്ദേശിച്ചത് സന്ദീപ് ബക്ഷിയാണെന്നാണ് സൂചനകൾ.
malayalam.goodreturns.in