സംസ്ഥാനത്തെ ഗാർഹിക ഉപഭോക്താക്കൾക്ക് ഇരുട്ടടിയായി കേന്ദ്രസർക്കാരിന്റെ പുതിയ നയം. ഗാർഹിക ഉപഭോക്താക്കൾക്ക് ലഭിക്കുന്ന വൈദ്യുതി സബ്സിഡി കുറയ്ക്കണമെന്നും സബ്സിഡി തുക ബാങ്ക് അക്കൗണ്ട് വഴി വിതരണം ചെയ്യണമെന്നുമാണ് കേന്ദ്രത്തിന്റെ നിർദ്ദേശം.

മാസം 120 യൂണിറ്റ് വരെ വൈദ്യുതി ഉപയോഗിക്കുന്നവർക്കുള്ള സബ്സിഡി തുക ബില്ലിൽ കുറവു ചെയ്യുന്നതിനു പകരം പകരം പാചകവാതക സബ്സിഡി നൽകുന്ന മാതൃകയിൽ ബാങ്ക് അക്കൗണ്ടിലേക്കു കൈമാറണമെന്നാണു നിർദേശം. കേരളത്തിലെ 50 ലക്ഷത്തിലേറെ ഗാർഹിക ഉപയോക്താക്കളെ ഇതു ബാധിക്കും.

വൈദ്യുതി ക്രോസ് സബ്സിഡി അടുത്ത ഏപ്രിൽ ഒന്നിന് 20 ശതമാനത്തിൽ താഴെയായി കുറയ്ക്കണമെന്നാണു മറ്റൊരു നിർദേശം. ഇതു നടപ്പാക്കിയാൽ ഗാർഹിക ഉപയോക്താക്കളുടെ വൈദ്യുതി നിരക്ക് വൻതോതിൽ വർദ്ധിക്കും. ഏറ്റവും കുറഞ്ഞ നിരക്കുകാർക്കു പോലും യൂണിറ്റിന് രണ്ടുരൂപയോളം വർദ്ധിക്കുമെന്നാണു വിലയിരുത്തൽ.

കേരളത്തിൽ ഇപ്പോഴുള്ളത് 50% ക്രോസ് സബ്സിഡിയാണ്. ഇത് 20 ശതമാനത്തിൽ താഴെയായി കുറച്ചാൽ നിലവിലുള്ള ഏറ്റവും കുറഞ്ഞ നിരക്ക് യൂണിറ്റിനു 2.50 രൂപ എന്നത് 4.48 രൂപയെങ്കിലുമാകും.

malayalam.goodreturns.in