രാജ്യത്ത് ഉടനീളമുള്ള ട്രാൻസ്പോർട്ട് യൂണിയനുകൾ ഇന്ന് മുതൽ അനിശ്ചിതകാലത്തേയ്ക്ക് ചരക്ക് വാഹന പണിമുടക്ക് പ്രഖ്യാപിച്ചു. അഖിലേന്ത്യാ മോട്ടോർ ട്രാൻസ്പോർട്ട് കോൺഗ്രസ് (AIMTC) ആണ് പണിമുടക്ക് പ്രഖ്യാപിച്ചിരിക്കുന്നത്. മറ്റ് ഗതാഗത സംഘടനകളുടെ പിന്തുണയും പണിമുടക്കിനുണ്ട്.

പെട്രോൾ വില വർദ്ധനവ് പരിഹരിക്കുക, ഹൈവേ ടോൾ നിരക്ക് കുറയ്ക്കുക, ഇന്‍ഷുറന്‍സ് പ്രീമിയം കുറയ്ക്കുക എന്നീ ആവശ്യങ്ങൾ ഉന്നയിച്ചാണ് പണിമുടക്കിന് ആഹ്വാനം ചെയ്തിരിക്കുന്നത്. രാജ്യവ്യാപകമായി പണിമുടക്കായതിനാൽ പച്ചക്കറികൾ, പാൽ തുടങ്ങിയ അവശ്യ സാധനങ്ങളുടെ വിതരണത്തെ പണിമുടക്ക് ബാധിച്ചേക്കാം. കൂടാതെ ഭക്ഷ്യ സാധനങ്ങള്‍ക്ക് വിലക്കയറ്റം ഉണ്ടാകുമെന്നും ആശങ്കയുണ്ട്.

രാജ്യവ്യാപകമായി നടക്കുന്ന അനിശ്ചിതകാല ലോറി സമരം കേരളത്തിലും ആരംഭിച്ചു. 90,000 ചരക്കുലോറികളാണ് സംസ്ഥാനത്ത് സമരത്തില്‍ പങ്കെടുക്കുന്നത്. കേരളത്തില്‍ നിന്ന് പുറത്തേക്കുള്ള ചരക്കുനീക്കം പൂര്‍ണമായി സ്തംഭിച്ചു. ആവശ്യങ്ങള്‍ സര്‍ക്കാര്‍ അംഗീകരിക്കും വരെ സമരം തുടരാനാണ് ലോറി ഉടമകളുടെ തീരുമാനം.

പെട്രോളും ഡീസലും ജിഎസ്ടിയ്ക്ക് കീഴിൽ കൊണ്ടു വന്ന് കേന്ദ്ര-സംസ്ഥാന നികുതികൾ കുറയ്ക്കണമെന്നും വിവിധ സംഘടനകൾ ആവശ്യപ്പെട്ടു. രാജ്യത്തെ 93 ലക്ഷം ട്രക്കുകൾ, 50 ലക്ഷത്തോളം ബസുകൾ, ടൂറിസ്റ്റ് ടാക്സികൾ, ക്യാബ് ഓപ്പറേറ്റർമാർ എന്നിവ എ.ഐ.എം.ടി.സിയുടെ ഭാഗമാണ്.

malayalam.goodreturns.in